Na Hulanda, Rotterdam, a tuma luga un certamen di beyesa yama Miss Mami Dushi cual a conoce participacion di un persona di Aruba. Esaki a tuma luga na Hilton Hotel na Rotterdam y tabata un anochi hopi special. Erginia Brown, concursante Arubiano cu a participa den Miss Mami Dushi ta bisa cu e mes a keda sorprendi di con tur cos a bay.
“Mi no a spera e premio di Miss Amistad, pero ja, mi semper t’ey pa duna e damanan un man, semper nos t’ey pa yuda otro.” Brown no a sali reina, pero el a gana Miss Amistad. Brown tin 42 aña, e ta un mama di tres, un persona naci na Aruba y ta bini for di San Nicolas. E ta un persona cu ta gusta carnaval.
P’e certamen aki nan mester a pasa door di varios ora di training y preparacion, y sigur tabata un experiencia unico y memorabel pa Brown. “E training ta dushi, mi a siña hopi di e workshop, mi a siña empodera mi mes, el a cambia mi,” segun Brown, kende ta spera cu e certamen aki sigui anto ta invita tur otro dama y mamanan pa participa den esaki.
Un conseho pa tur mama cu kisas ta nan so y ta pasando door di duro, e ta bisa cu no worry kico bo ta pasando aden nunca e ta e final di bo caminda. Bo tin cu lanta y lucha pa dilanti pasobra nos tur tin un reina den nos segun Brown ta bisa.
Esun tras di tur esaki ta Alex Martijn, creador di Miss Mami Dushi anto el a cuminsa cune pasobra anteriormente e tabata haci Miss Mama Modelo Latina. E mesun concepto di empodera e mamanan, dus a bin cu e idea pa haci esaki p’e mamanan Antiyano tambe. “Danki Dios cu hopi exito manera nos a mira,” segun Martijn. No ta importa tante e beyesa di pafo pero loke tin paden. “Esey tabata ful e intencion di e evento pa demostra cu e beyesa intelectual ta uno cu ta conta masha hopi mes, mas cu e beyesa fisico,” segun Martijn.
