Un biaha mas Colegio EPI ta preparando pa The Voice durante un Ora Loca. Juffrouw Vanessa Loefstop, docente na Colegio EPI, unidad Hospitalidad y Turismo a conta nan tabata tin un Ora Loca, di 10’or pa 11’or di mainta na scol mes, cual ta un ora cu nan ta haci un tiki di celebracion di Carnaval.
Alabes nan a duna un regalo na nan reina di Colegio EPI, cu a representa e unidad di hospitalidad y turismo. Fuera di esey ta promoviendo nan evento di The Voice: EPI Edition.
Studiantenan por a pasa entre e ora ya menciona y nan por bin celebra tambe un rato y por inscribi pa e evento di The Voice. Tin prijsnan special na e Food Court. A invita tur studiante pa pasa na Food Court di Colegio EPI y pa recorda nan cu despues di 11’or e lesnan ta sigui normal.
Emily Hincapie, studiante di e unidad di hospital y alabes presidente di e Student Council a comenta cu e evento tabata hopi bon. E tabata un introduccion di The Voice. E aña anterior a haci algo similar, cual tambe a bay hopi bon.
Aña pasa tabata tin mas of menos 17 participante pa e evento den ambos categoria A y B. Un categoria ta pa esnan cu tin mas experiencia den canto y e otro tabata mas pa principiantenan.
E studiantenan tin cu bay cantina si nan ta interesa, pa inscribi na e luga di meneer Oslin. Ta bay tin un fee chikito, cu ta inclui un lunch chikito, plus e participacion di The Voice. Mescos cu aña pasa, nan tabata tin T-shirt.
E evento lo tuma luga dia 30 di mei. Mirando cu el a bay hopi bon aña pasa, e expectativa ta grandi. Inscripcion lo ta full februari, pa despues cuminsa cu training, coaching, etc.
Emily ta invita tur studiante di EPI cu ta interesa, pasa na cantina y inscribi pa asina abo tambe por participa den The Voice.
Ora Loca
Rachel Hennep, secretaria di e Student Council di EPI a comenta cu e evento di La Ora Loca tabata un evento carnavalesco, incluyendo e inscripcion pa The Voice, cu a habri awe diahuebs. Tambe pa inscribi por manda un mensahe riba e pagina di Facebook di The Voice.
Rachel a sigui splica cu nan tin un all star band durante La Ora Loca y tambe lo ta e banda pa The Voice riba e anochi ey.
Conoce un parti nobo dibo, sali for di bo comfort zone. Inscribi den e cantina di EPI y demostra bo talento den The Voice: EPI Edition.
