E siman aki ta SO week, pero desde siman pasa EPB Hato a cuminsa cu e siman di SO week training. A prepara e muchanan con e mester bay, tin cu para den rij, tin cu para 1.5 meter leu di otro, con tin cu drenta cas, laba y saca man. Tambe ta mustra e studiantenan unda nan tin cu sinta y e studiantenan tin di presenta cu nan facemask.
Pa cada klas a pone 9 alumno y 1 docente, p’asina tin 10 persona, asina Joan Palm, docente sector service/ director suplente, a bisa. Durante e SO training e tabata un tiki fastioso, pasobra nan no ta compronde cu no mag di ta mucho pega na otro y cada rato mester hala nan atencion riba e distancia social. Practicamente tur mucha tin mondkapje y no tabata unproblema. E parti di tene distancia tabata mas dificil pa nan, pasobra ta topa otro despues di tanto luna y kier bay papia y di ta pega.
Segun Palm, e training a bay bon y e muchanan por a bisa pa ki vak nan kier extra atencion. Maestronan a splica e muchanan via e google classroom y esnan cu ta den necesidad a presenta na scol pa haya extra atencion. A base di loke e studiantenan a pidi, a traha un schema pa presenta na scol.
Un pregunta grandi cu tin ainda ta kico nan mag y kico no mag. Palm a bisa cu mucha ta keda mucha y cu nan ta hoben y ta keda hoben. Pa nan tende cu nan no mag ta cerca di otro, esaki lo ta hopi dificil y e no lo ta un trabou facil.
Cindy Tromp, studiante di EPB Hato sector Service, tabatin contacto cu su mentor via app, kende tabata manda mensahe den e chat di klas. E tabata informa nan kico tabata bay pasa despues. Tambe tabata manda e informacion manera rooster pa nan por keda na altura. El a bisa cu na momento a yega scol, nan mester a para den rij y bay ariba unda cu tabatin 6 mucha den klas. Na cas nan tabata traha e SO stof cu nan a ricibi via post. Segun Tromp, el a haya e manera aki un tiki fastioso pasobra tabatin cosnan cu e no a compronde y mester a bay scol pa haya splicacion. E ta contento y pura pa caba.
Dia 10 di juni lo tin e resultado, pero ta deliberando con esey lo tuma luga. EPB Hato tin 291 candidato di examen y segun Palm ainda no sa con esey lo sosode. A pensa pa yama 1 pa 1 of pasa cu auto, pero no sa ainda precies. E alumnonan lo tende mas despues di e scol con lo haci esey.
