Departamento di Labor y Investigacion ta in forma cu e Ordenansa Laboral 2013 (Arbeidsverordening 2013, AB 2013 no. 14) ta vigente desde 1 di april 2013.
Basa riba articulo 30, inciso number dos di e Ordenansa Laboral 2013, un dunado di trabou ta obliga pa entrega e Registro di Personal (Personeelsregister 2018-2019) na Director di Departamento di Labor & Investigacion (DAO).
Den e Decreto Nacional Registronan di Ordenansa Laboral 2013 ta regla e modelo di e Registro di Personal. E registro di Personal ta consisti di tres parti, Modelo 1A, e personal actual manera registra na december 2018; Modelo 1B, e necesidad pa personal pa 2019 y Modelo 1C, e necesidad di personal pa cada proyecto specifico.
Departamento di Labor ta informa pa medio di e comunicado di prensa aki cu e periodo di entrega di Registro di Personal 2018-2019 pa tur empresa na Aruba lo ta di 15 di februari 2019 te cu 15 di april 2019.
Cambio den forma di e Registro di personal 2018-2019
E aña aki e unico forma cu por entrega e Registro di Personal ta den e forma digital. Desde 28 di januari 2019 por download e formulario digital: Registro di personal 2018-2019, cu ta consisti di 3 pagina for di website www.daoaruba.com of www.gobierno.aw. of por haci un peticion via e-mail adres [email protected] y DAO lo mail bo e formulario digital.
Unda y con por entrega e formulario di personal 2018-2019
DAO ta haci un peticion pa hinca e datonan den e formulario digital, segun e modelo stipula pa ley y manda nos esaki na e e-mail adres [email protected] .
Den caso cu bo compania tin mas sucursal, DAO ta haci un peticion pa yena un formulario cu tur dato di trahado y pa indica cua trahado ta rouleer na bo sucursalnan (trahado cu ta traha na diferente sucursal), door di pone un strea (*) den kolom patras di e kolom No. riba e formulario digital. Tambe nos ta informa cu ta obligatorio pa yena tur 3 modelo. Den caso cu no tin necesidad pa personal of necesidad pa personal pa cada proyecto specifico pa 2019, ta yena nihil ariba modelo 1B y modelo 1C.
DAO lo manda’bo via un e-mail un comprobante cu a ricibi bo formulario di Registro di Personal 2018-2019. Tene cuenta c’e comprobante di entrega no ta implica aprobacion d’e Registro di Personal 2018- 2019. DAO lo duna durante aña 2019 aprobacion of desaprobacion d’e Registro di Personal 2018-2019.
Tene na cuenta cu entrega d’e Registro di personal 2018-2019 ta obligatorio
den e periodo di
15 di februari 2019 te cu 15 di april 2019.
Companianan cu no ta cumpli cu entrega di e Registro di Personal den e periodo menciona como tambe esnan cu no a entrega esaki e aña anterior ta den incumplimento cu articulo 30 di e Ordenansa Laboral 2013. DAO pronto lo bay over pa tuma accion contra esakinan. E compania lo por ricibi un sancion administrativo di afl. 5000,- pa no cumpli cu e obligacion di entrega e Registro di Personal. Tene bon na cuenta cu den caso cu no yena e formulario di Registro di Personal correctamente, ta considera cu e compania ta den incumplimento.
Pa companianan cu ta haci uzo di un intermediario (p.e. accountings- of adviesbureau) DAO kier recorda cu cumplimento di nos leynan laboral ta un obligacion di e dunado di trabou y no di e intermediario. Si tin mas pregunta tocante e Registro di Personal por tuma contacto cu Sra. Louisetty Croes na 523-7722 of via email [email protected] of c’un funcionario di Bureau Arbeidsmarktonderzoek na 523-7720.
