Entrega di ‘Air Operator Certificate’ (AOC) na Divi Divi Air

Minister Zita Jesus-Leito huntu ku Outoridat di Aviashon Sivil di Kòrsou (CCAA) a entrega Divi Divi Air nan ‘Air Operator Certificate’ dia 16 di novèmber 2018.

E AOC aki ta un aprobashon di CCAA ku Divi Divi Air ta kumpli ku aspektonan di lei i por sigui usa avionnan pa propósitonan komersial. E sertifikado aki ta obligá Divi Divi Air di sòru pa e tin personal, ekipo, i sistemanan pa garantisá seguridat di su empleadonan i di públiko en general.

Riba un anekso di e sertifikado di outorisashon aki tin un lista di tur e tipo di avionnan i registrashonnan ku lo wòrdu usa, pa ki propósito, i den kua área, pues kua aeropuerto òf region geográfiko. Kada 3 aña un kompania di aviashon mester pasa e proseso di sertifikashon di nobo pa por risibí su AOC

Divi Divi Air ta un kompania di aviashon lokal ku tin buelonan entre Kòrsou, Aruba i Boneiru. Divi Divi Air aktualmente tin 4 avion total: 2 asina yama ‘Britten Norman Islander’, i 2 ‘Viking Twin Otter’. ‘Britten Norman Islander’ tin un kapasidat di 9 pasahero i ta bula entre Kòrsou i Boneiru. For di febrüari di e aña aki, nan a introdusí e avionnan ‘Viking Twin Otter’ ku tin un kapasidat di 19 pasahero pa bula entre e 3 islanan. Divi tin un promedio di 8 buelo pa dia di Kòrsou pa Boneiru i 3 buelo pa dia di Kòrsou pa Aruba.

Divi Divi Air a kompletá nan proseso di sertifikashon di AOC konforme e sistema introdusí na CCAA na 2015 titulá Curacao Civil Aviation Regulations (CCARs). Nan ta e promé kompania di aviashon na Kòrsou ku a keda sertifiká konforme e regulashonnan aki.

Pa mas informashon tokante CCAA, bishita nan website www.ccaa.cw.