Entidad Hulandes lo por maneha finansa di Aruba pa por lo menos 7 aña

Gobierno di Corsou ta resulta hopi mas transparente y no ta sconde nada di e pakete di condicion cu Gobierno di Reino a pone riba mesa pa por otorga fiansa na Aruba, Corsou y Sint Maarten. E tres Gobiernonan a haya 4 dia pa reacciona si ta bay di acuerdo pasobra diabierna awo mester sea bay di acuerdo of nenga e pakete den Conseho di Minister di Reino Hulandes. Aceptacion lo nifica cu automaticamente e fiansa pa e luna aki y esunnan cu ta sigui lo pasa sin problema.

Pero, mescos cu cualkier banco, aki tambe tin condicionnan. Sinembargo Gobierno di Hulanda ta probecha pa regla tur asunto cu nan tin decadanan ta taha e islanan di dje y a purba tur manera pa por tin un miho finansa publico. Ta parce cu e decision di e tres paisnan pa para riba propio pia, na final, no ta sostenibel y no ta manehabel. Si tuma Aruba como ehempel, cu excepcion di un of dos aña, nunca nos a logra un presupuesto balansa. Nos a biba henter nos bida ta fia placa tur aña pa por balansa nos presupuesto pasobra nos gastonan semper ta hopi mas cu nos entradanan.

Corsou y Sint Maarten a haya un regalo special di 2 biyon florin na momento cu nan a elimina Antias y a bira paisnan independiente den Reino Hulandes. A dura nan exactamente 10 aña pa bolbe hinca e paisnan den debenan grandi atrobe.

Gobierno di Hulanda a manda un pakete pisa abou, Aruba ta papia di un documento di 218 pagina, den cual ta anuncia tur e condicionnan cu mester acepta pa por haya fiansa pa paga salario di ambtenaarnan, paga Subsidio di Salario na sector priva y pa paga FASE na esunnan cu a perde trabou e luna aki ainda.

Minister Presidente di Aruba a bisa di lo repasa e documento internamente prome cu sali publica e condicionnan. Parlamentario Daphne Lejues a pidi’e ayera pa comparti e documentonan cu Parlamento, den cuadro di transparencia. Sinembargo, Gobierno di Corsou a sali awe anuncia caba algun condicion y a avisa cu awe pa 11:30am lo tene un conferencia di prensa pa repasa tur e condicionnan mara na e yudansa financiero di nos pais mama.

A bisa cu e entidad nobo cu lo maneha e fiansa pa e paisnan den Caribe Hulandes lo ta bou maneho di tres Hulandes y nan lo tey pa por lo menos 7 aña. Nan tin e tarea pa reforma gobernacion, asuntonan economico y mas. Corsou ta sinti, mescos cu Aruba, cu cumpliendo cu e condicionnan impone pa nos pais mama, lo mina nos autonomia pisa y cu e no lo bay sin consecuencia pa e bienestar general di nos pueblo.

Awo tur hende ta pendiente pa e condicionnan y ta di spera cu nos na Aruba lo no mester warda pa scucha for di Minister Presidente di Corsou riba kico lo ta nos destino aki na Aruba y ta spera sinceramente cu Minister Presidente mr. Evelyn Wever-Croes lo sa di asumi su responsabilidad y informa pueblo di Aruba di kico ta spera nos a cambio di e fiansa cu nos ta den necesidad urgente di dje pa por sobrebibi riba e isla aki te ora cu e pandemia bay y nos turismo por ta bek riba pia.