SEPPA y e trahadonan di Bureau Centro Multidisciplinario (MdC) ta lamenta cu te dia di awe 16 di juli 2019 no a bin cu solucionnan fiho pa tur punto den e manifesto cu a entrega riba 19 di juni 2019 na Minister President. A palabra cu lo trata e precupacionnan di Bureau Centro Multidisciplinario den Ministerraad y cu despues lo wordo informa door di Minister President of Vice Premier. No a haya reaccion concreto encuanto esaki. Parlamento di Aruba tambe a ricibi e manifesto riba 19 di juni 2019 y ainda e centro aki ta warda ariba un reaccion di parti di Parlamento di Aruba.
Minister Lampe a haya e tarea for di Minister President pa dialoga cu SEPPA y e trahadonan di Centro Multidisciplinario. Mientras esaki no tabata e palabracion entre Minister President y cu Vice Premier, toch tabata dispuesto pa scucha Minister Lampe, a pesar di e hecho cu cerca trahadornan NO tin confianza den e Minister, NO tin confianza cu lo yega na solución cu e minister di enseñanza actual.
E combersacion no tabata un dialogo y no a yega na otro. Minister Lampe ta keda mantene su puntonan sin argumentonan bon funda y ainda no tin claridad tocante e continuacion di e departamento Centro di Observacion (Observatiecentrum) y Teacher Care.
Minister Lampe no ta wak posibilidad pa fortfiica e departamento Centro di Experticio (Expertisecentrum) unda tin lista di espera pa atende cliente, mientras e la aproba pa personal di Centro Multidisciplinario bai ter beschikking otro caminda. Esaki ta contradictorio.
Banda di esey Minister Lampe a vocifera cu ta bin cu un comission national di indicacion (nationale indicatiecommissie) cu ta controla, a base di criteria stipula, consehonan duna tocante ki tipo di ensenansa ta adecua pa un alumno haya. E comission national di indicacion aki lo bay haci un tarea cu Centro Multidisciplinario ta haciendo caba y pa bin cu un comission asina aserca ta innecesario. No a involucra e profesionalnan di Centro Multidisciplinario den e proceso aki, mientras e profesionalnan tin e experticio y experiencia, y pa mas cu 30 aña ta carga e tarea di indicacion pa enseñansa special y tin un control interno caba. Si tin puntonan pa traha riba dje mes, tin otro manera pa atende e puntonan aki, entre otro involucra e profesionalnan mes cu tin e tarea aki y pa no bin cu cambio y decisionnan a base di solamente 1 opinion. Ta bisa cu tin personeelstop y no tin placa pa por fortalese e centro aki. Pues unda gobierno ta bay saca fondo pa e comision esaki? Esaki atrobe ta contradictorio.
Tin mayornan pendiente pa haya contesta kico lo pasa cu futuro di nan yiunan. Mayornan, maestronan y scolnan ta en espera pa haya claridad mescos cu e trahadonan di Centro Multidisciplinario encuanto continuacion di nan servicio. Den algun dia e aña escolar nobo ta cuminsa y no tin claridad. Ta lamenta cu despues di tur esfuerso ainda e situacion ta igual.
Tampoco no a involucra Centro Multidisciplinario for di principio den e desaroyo di Plan Enseñansa National (PEN) y Sociaal Crisis Plan.
E trahadornan di e centro aki ta haya di sumo importancia pa tin dialogo, información, involucracion y pa asina por carga e cambionan. Esaki pa evita cu ta bin cu desicion of cambio sin tene cuenta cu tur factor y actor involucra. Ta boga pa inclui e profesionalnan di e centro den e procesonan aki, mirando Centro Multidisciplinario su rol importante y crucial den nos enseñansa. Asina ta evita cu desicionnan por ta den desventaha di e ayudo na nos muchanan y calidad di cuido den enseñansa.
Procedura professional, integro y transparente ta pa analisa kico ta punto pa traha riba dje, involucra e professionalnan conserni y no manera e maneho unilateral aki di Minister Lampe cu a trece hopi incertidumbre te dia di awe dor di no trece claridad pa e mayornan, maestronan y e trahadonan di e centro aki.
Pa ultimo por conclui cu ta cuestionabel cu ta laga personal bay ter beschikking for di Centro Multidisciplinario pa otro caminda, cu no por reemplasa nan, no ta yena vacatura, cu kier sera e Observatiecentrum y Teacher Care, kier kita e tarea di indicacion y ta exclui e centro aki di tur desaroyo ariba nivel di enseñansa y kier haci esakinan sin argumentonan bon funda y no carga.
Mientras cu na comienzo a kere cu kizas ta e Ministro di Enseñansa so ta pensa di e forma aki, aworakinan tin e duda, ya cu di parti di esnan na cabez di e gobernación mes, no tin ningún solución di nan banda cu a bin riba mesa
