Pa algun siman caba tin bastante incertidumbre bao di docentenan cu ta resorta bao Scolnan Publico. Sigur despues di a mira con den un forma scondi e Minister kier haci diferente cambionan, hinca diferente scol bao di otro y diferente scol publico bao di fundacion. Ta manera cu e docentenan no por tin pas. Constantemente tin algo nobo, asina Sindicato di Empleadonan Publico y Priva Aruba (SEPPA), a anuncia den un relato di prensa.
Un di e preguntanan cu SEPPA y SIMAR a haci na gobierno tabata, ki garantia enseñansa tin cu den tur e momentonan dificil aki cu nos tur ta travesando cu atrobe enseñansa no ta hay’e cu cambionan adhoc??
Masha lihe e cambionan a sali ya cu desde maart tin desicionnan den Conseho di Minister. Atrobe desicionnan sin consulta cu sindicatonan, sin participacion di e expertonan na pia di trabao. Awor EPI parce di ta bay cai bao di EPB, Julianaschool y Ceque College ta bai cay bao di SMOA y asina tin mas cambio!
Por keda bisa cu salario no ta cambia, pero esaki no ta e unico cos cu e docentenan ta mira. Pero e docentenan ya caba ta poniendo nan mes na altura di kico ta pasando y e reaccionnan pronto lo sali.
