Despues cu dos preso hoben a huy hunto for di prizon den siman, mesora den politica a cuminsa resona bosnan pidiendo pa e Minister saca su conclusion. Un ke otro tin di haber cu su mesun declaracionnan haci den pasado, ora e tabata den oposicion. A formula un encuesta den cual ta puntea nos audiencia durante un dia largo, cu si e Minister mester tuma retiro of no. E resultado ta conoci, mayoria ta haya cu esaki mester ta final di e carera di mr. Andin Bikker como Minister di Husticia, Migracion y Siguridad.
Un total di 2500 usuario riba Facebook a vota den e encuesta. Na tur 1700 ta haya cu Andin Bikker mester baha como Minister despues di tanto fayo asina den e aparato hudicial. Di otro banda, 791 usuario ta pensa cu e no mester tuma su retiro. E cifranan ta representa un indice di desaprobacion di 69% contra 31% cu ta na fabor pa e keda den funcion.
Tocante Andin Bikker
Andin Ceasar Giovanni Bikker naci dia 20 di augustus 1969 ta casa y tin 2 yiu muhe. E ta Minister di Husticia y Migracion desde November 2017 den Gabinete Wever-Croes. Despues di su estudio na scol basico y secundario, el a studia na Vrije Universiteit van Amsterdam den materia Notarieel Recht y Nederlands Recht. Na Aruba el a traha como abogado na Bufete Croes, Wever & Tchong, pa despues hunto cu Abogado Lincoln “Dello” Gomez funda Gomez & Bikker (Go-Bik) Law Office. Na 2018 el a sali for di e bufete aki, despues di ocupa e funcion di Minister.
Andin Bikker ta fundado di Partido Democracia Real, a bira e prome y unico Lider y a fungi como Parlamentario for di aña 2009 te 2017 pero a opta pa uni cu Otmar Oduber pa funda Partido POR y a bay eleccion como candidato # 2 den eleccion na September 2017.
Politicamente, e fusion cu Otmar Oduber den POR no a cumbini’e….el a baha den voto y a logra su record di menos voto den henter su carera politico. Andin Bikker a participa na eleccion Parlamentario pa prome biaha cu Partido PDR na aña 2005 y a logra no menos di 1262 voto individual. Den eleccion na aña 2009 el a sigui crece y a alcansa 1621 voto riba su nomber. Den eleccion na 2013 el a casi redobla su votonan y a yega te cu 3047 voto personal. Sinembargo, ora el a soña cu sigui crece politicamente den eleccion di aña 2017, votadonan a castig’e pa su decision pa uni den POR y a cay den voto te cu 1086 voto individual, cu ta representa un caida di 64.3%.
