Ribe website mas grandi di Aruba, esta 24ora.com, mas di 3600 usuario a participa den un encuesta cu e pregunta cu si ta pensa cu Parlamentario Sue-Ann Ras di MEP lo mester retira despues di a comete un blunder di mira pelicula via Netflix memey di pleno reunion den Eerste Kamer na Hulanda. Un total di 61% a opina cu e NO mester retira, mientras cu 39% si ta haya cu el a tuma e decision corecto di bandona Parlamento. Directiva di partido MEP tuma su carta di retiro pero a bisa di lo atende despues di reces.
Sue-Ann Ras mes a yega Aruba for di Hulanda pero a subi avion mesora su tras y a bay afo. No ta conoci si ta pa trabou of cu vakantie pa por pensa kico lo bira di su carera. Ey e lo mester determina si e lo sigui den politica of ta bay bek den enseñansa. Den gang ta papia cu Minister Glenbert Croes lo kier pa e yud’e cu Crisis Plan Social.
Mayoria Minister Y Parlamentario a reacciona mesora despues di e anuncio di Sue-Ann Ras dialuna mainta, cu el a haci lo corecto. Nan hasta a elogi’e cu el a cambia e forma di traha den Parlamento y cu el a asumi su responsabilidad pa su eror. Pero, despues cu a realisa di e problema cu ta spera nan cu Luigi Bergen y su retonan den famia, cu tur esunnan cu a elogia Ras a bolter y a pidi’e pa e reevalua su decision y pa e keda toch.
E hecho cu Minister Romero e mesun dialuna mainta a manda Bergen y Brito cas debi na escalacion di problemanan amoroso den su Ministerio, a haci cu Bergen lo no tin mucho interes tampoco pa e puesto. Pero e stoel ta di dje y e por opta por ehempel pa asumi e puesto toch pero bira independiente. Cu e problemanan den coalicion cu RED y Ricardo Croes, lo ta mal “timing” pa purba un hazaña awo cu Bergen pasobra di un rato pa otro coalicion por perde mayoria y Gobierno ta cay.
Prome Minister Evelyn Wever, alabes lider di MEP tin un vakantie pisa aki pa e pensa con e lo maneha e asunto di CAft y con pa maneha e presion interno cu si ta laga Ras bay of no. Entodo caso riba internet den encuesta, un gran mayoria ta haya cu Sue-Ann Ras mester pidi despensa y djis keda.
