Encuesta: Mas cu mita di alumnonan lo no cuminsa creche na juni ainda

“Coronacrisis a afecta 100% nos localidad cual ta lamentabel. For di momento cu noticia a drenta na maart, dia 13 di maart pa ta exacto, cual ta un dia cu no lo bay lubida nunca mas, ora un di e juffrouwnan a drenta y avisa cu nos isla ta afecta y cu lo cera tur scol na Aruba, e momento di panico a cuminsa te na e momentonan aki”, asina Lilly Arends, Director di Lillyputters Peuterschool a duna di conoce. Preparacion pa e “Normal Nobo” no ta mucho diferente di locual cu semper tabata normal pa un creche. Higiena, labamento di man y limpiesa en general na scol, cu ta menciona pa e normal nobo, ta rekisitonan standard caba, no di awo, pero for di semper! 

Encuesta: Mas cu mita di alumnonan lo no cuminsa creche na juni ainda

Encuesta: Mas cu mita di alumnonan lo no cuminsa creche na juni ainda. Click e link pa mas https://24ora.news/2yOWYKq

Posted by 24ora on Sunday, May 31, 2020

Den contacto durante dos luna cu e mayornan, cu e alumnonan cual tabata haya hopi falta di nan, via video/ whatsapp, e pensamento tabata varia, e situacion tabatin biaha bira depresivo y a dicidi di haci un encuesta riba e incertidumbre di habri scol bek prome di juni of ta prefera di warda un luna mas y habri prome di juli/augustus. Tin di bisa cu 52% di e mayornan cu a forma parti di e encuesta no lo bin bek pa prome di juni, algun porciento lo regresa pa juli y pa luna di augustus sigur mayoria lo regresa.

Cu un trayectoria di 42 aña den servicio cu e scol, semper higiena tabata na prome luga, adicional lo tin cu aumenta e cantidad di biaha cu lo laba man cerca e muchanan. Tin cu remarca cu ta trata di mucha y cu esaki ta dificil, pesey tabata uza wipes entre e mas chikitonan (Baby) cu ta entre 1 pa 4 aña pero higiena halto na tur momento. Stoel, mesa y demas cosnan di hunga ta pasa den limpiesa diario pa sigura cu prome cu e muchanan yega tur cos ta limpi.

Lilly Arends ta agrega cu locual e ta mira di ta e adaptacion pa e normal nobo lo ta mas borchinan di indicacion pa recorda riba labamento di man, a agrega un labamano portatil pa ricibi e muchanan, pa e ta mas oficial cu mester keda laba man. Ta algo cu Lillyputters tabatin incorpora semper den su structura.

A pone atencion riba e punto cu mester tene e muchanan separa, cual ta algo cu tambe ta conoci cu ta traha den grupo pero ta dificil pasobra mucha ta keda mucha y ta hunga cu otro. Un peticion cu tambe a drenta ta pa e Juffrouw/leidsters purba di no ta den contacto cu e mayornan pa asina preveni y defende nan mes contra posibel contagio.

Pa locual ta trata pago y situacion financiero, tanto di e mayornan como di e creche mes, cu tambe tin cu paga trahado, ta hopi dificil awor. A compronde cu mayoria scol no a cobra ni luna di maart ni di april bayendo tambe pa luna di mei 100% down. E cobransa cu ta bay haci awo ta luna di juni y spera di no tin contratiempo, te cu awo no a presenta ningun mayor cu a indica cu pa motibo di perdida di trabou no por paga of baha e prijs. Ta mira cu por cobra y asina duna espacio pa recupera y mira dilanti pensando realistico (sin carga speransa falso) cu e por bira pio. Lo por pensa riba flexibilidad (cu pago of areglo di pago) pero no ta mira esaki actualmente tuma luga. Pero ta algo cu tin cu bay observa dia pa dia mientras tur cos ta cuminsa bolbe na normalidad.

Pa locual ta trata e rutina, Lilly Arends ta di opinion cu muchanan mester ta liber pa hunga. No por obliga mucha pa sinta y/of haci cierto cosnan pero ta laga nan hunga liber semper bou di guia cu ta parti esencial den nan crecemento. Lo pone atencion pa separa y traha gruponan mas chikito y purba evita contacto entre nan, pero lo ta hopi dificil. Mucha den e edad ey ta den tempo di hopi amor y cariño di cual hopi di nan ta pidi atencion, cu brasamento y sigur lo ta dificil pa evita. 

Gran mayoria di e mayornan no ta di acuerdo cu uzo di hand sanitizer pa nan baby, cual Lilly Arends tambe ta di acuerdo pero lo opta pa tene nan man limpi mas cu ta posibel uzando wipes y laba man prome y despues di come manera ta rekeri pa DVG.

Ta trata di muchanan hopi chikito (Baby), como tal pocopoco y den sistema di wega, lo splica nan e motibo di cierto cambio, e crisis cu nos pais a y ta pasando aden, kico ta virus pero tur esaki den nan nivel di comprondemento y na un manera diferente pa nan tambe ta envolvi, pero semper teniendo na cuenta cu nan ta den un etapa di hunga y como tal esey lo ta principal.