Encuesta: 58% cu a vota na Florida a haci’e pa Biden

Un encuesta publica diabierna na Florida (Merca) a revela cu 58% di esnan encuesta a bisa cu ya nan a vota, via post of anticipadamente, y a haci’e pa e democrata Joe Biden y 39% a duna nan voto na presidente Donald Trump.

E encuesta realisa pa St. Pete Polls pa e medio digital Florida Politics, ta indica cu si a tene na cuenta cu tur e posibel votantenan Floridano den e eleccionnan presidencial di dia 3 di november e diferencia ta di dos punto na fabor di Biden, cu ta e mesun puntonan cu e margen di eror di e sondeo.

Un 49% ta bisa cu nan lo scoge Biden contra un 47% cu ta inclina pa Trump, na cual tin cu suma un 2% di e indecisonan.

Como 60% di e encuestadonan ta bisa cu ya nan a vota, e bentaha di Biden den e estado crucial aki parce ta mas stabiel, Florida Politics ta bisa

Rond di un 48% di e encuestadonan ta afirma cu na 2016 a vota pa Trump, menos di un 44% a bisa cu a scoge Hillary Clinton y mas di un 4% no kier a contesta e pregunta aki.

St. Pete Polls a entrevista 2.527 probabel votante di Florida e dianan 21 y 22 di october atrabes di un sistema telefonico di respuesta automatisa.

Precisamente diabierna e Division di Eleccionnan di Florida a informa cu ya ta mas di 4,7 miyon di Floridano cu a vota ora cu falta 11 dia pa e eleccionnan.

E cifra exacto ta 4.771.956 votante. Di nan mas di 3,38 miyon a vota via post y entre nan tin 1.610.564 voto di personanan registra como democrata, 1.042.525 di republicano y e resto di votante pa e otro partidonan.

Casi 688 mil ta di e personanan inscribi como votantenan independiente y 40.483 di votante pa otro partido.

En persona a vota te cu awor aki 1,3 miyon di persona, di cual 641.324 ta republicano, 499.802 democrata, 234.115 sin afiliacion politico y 16.451 di otro partido.

Florida ta e mayor di e estadonan cu no tin un patronchi di voto fiho y ta aporta na e candidato mas vota pa e residentenan di Florida 29 voto den e Colegio Electoral, cu ta caminda cu ta dicidi den ultimo instante e ganado di e eleccionnan presidencial di Merca.

Ta p’esey Florida ta asina importante den e eleccion di e presidente y di eynan cu Trump y Biden y su compañeronan di formula, MIke Pence y Kamala Harris, respectivamente, ta intensificando nan actividadnan electoral diasabra den e recta final di e campaña.

Riba e dia di awe e bentaha di Biden riba Trump den e sondeonan di intencion di voto na Florida ta di 1,5 punto, di acuerdo cu e promedio cu e website RealClear Politics a elabora.

Den conhunto di e pais ta di 7,9%, segun e mesun medio.

Trump tin premira awe dos rally na Florida, uno den The Villages y otro na Pensacola, dos punto clave Republicano den e parti mas ariba di e estado.

E presidente lo pasa e anochi den Mar-a-lago, su residencia na Palm Beach (zuidoost di Florida) caminda cu mañan diasabra tin premira pa vota delanta prome cu sigui cu su campaña den otro estadonan.

Diasabra Mike Pence lo tuma e relevo, mientras cu e democratanan lo tin como orador fuerte durante e fin di siman aki e expresidente Barak Obama, kende lo participa den un rally motorisa na Miami cual no a duna hopi detaye.