“Semper ta un placer pa duna reconocemento na empleadonan publico cu, basa riba nan añanan di dedicacion, a sa di mantene un departamento di Gobierno optimalmente”, tabata palabranan di Minister Chris Romero na ocasion di e aniversario laboral di 6 empleado di Dienst Telecommunicatie Zaken (DTZ).

Den presencia di coleganan di DTZ, e titular di e cartera di Telecomunicacion a duna un reconocemento special na Director di DTZ, Ludwig Jansen, kende ta celebrando 30 aña como empleado di Gobierno. Tambe Minister Romero a reconoce e trabou y dedicacion di sra. Jeany Silonero Dania, cu a cumpli 40 aña como empleado publico. Otro empledonan cu tambe a wordo reconoci door di Minister Chris Romero tabata Kennedy Lovell, Franklin Lampe, Gilbert Damian, kendenan a cumpli 30 aña di servicio respectivamente y Tomas Correa cu a cumpli 25 aña trahando como empleado publico.

Minister Chris Romero a haci entrega di e envelop y plakaat di reconocemento na e hubilarionan den un ambiente di celebracion, na Direccion di Asuntonan di Telecomunicacion (DTZ). Hopi pabien y masha danki na e 6 empleadonan publico aki pa nan esfuerso y dedicacion pa pais Aruba.

Comments

comments