Ayera mainta Federacion di Trahadornan di Aruba y Caribbean Mercantile Bank (CMB) a marca historia firmando e prome Contrato Colectivo di Trabou (CAO) desde fundacion di e banco. Despues di basta luna di negociacion, partidonan a logra yega na un acuerdo den cual ta garantisa diferente beneficio existente como tambe ta inclui varios adelanto significante pa e 118 empleadonan representa dor di FTA. Esaki ta haci cu e trahadonan tin miho beneficionan awor cu nan ta conta cu representacion sindical.
E adelantonan ta encera entre otro:
– Aceleracion di e aumento di dianan di vacacion;
– ½ dia liber cu pago den e luna di cumpleaño di e empleado;
– ½ dia liber cu pago pa luna pa tur empleado (muhe y homber) cu jiu bou di 14 aña;
– Rebaho di e siman di trabao pa esnan cu 25 aña di servicio of mas;
– Aumento di e “meal allowance” na momento di traha overtime;
– Aumento di e compensacion di “on call” y pago di overtime na momento cu wordo yama pa traha;
– Aumento di e gratificacion di hubileo pa empleadonan existente;
– Aumento di e regalo di casamento como tambe e regalo na momento di haya yiu;
– Compensacion pa gastonan di cuido di yiunan bou 6 aña na momento di traha overtime (babysitting) ;
– Compensacion pa gastonan di cuido diario pa yiunan bou di 6 aña (daycare);
– Compensacion pa aumento di costo di bida cu un minimo di 1% te un maximo di 4%;
– “Signing bonus”.
A scoge pa un CAO cu duracion di 3 aña cu ta ofrece stabilidad tanto na e trahadonan como tambe na e empresa. Sindicato FTA ta felicita e ekipo negociado di FTA cu ta consisti di nos delegadonan, kendenan por cierto a haci un trabao ehemplar, como tambe Rudy Geerman di nos Departamento di Negociacion (DENEG) pa nan determinacion y perseverancia cu a resulta den un CAO cu tur envolvi por ta sumamente orguyoso di dje. Den UNION tin forsa!
