Na okashon di e di-100 aniversario di independensia di Finlandia, e konsulado lokal ta
preparando un seminario pa dia 20 di novèmber tokante ‘Solushon i aplikashonnan duradero’.
Finlandia ta un ehèmpel di durabilidat riba diferente nivel i tereno. Kumpliendo ku e tareanan di un konsulado, ta tratando atraves di e seminario aki pa traha un brùg pa e komunidat di Kòrsou. Pa e okashon spesial aki e ‘roving ambassador’ Jukka Pietikäinen pa área di Karibe ta bini Kòrsou. Ta preparando e seminario den estrecho koperashon ku e embahada di Finlandia na Den Haag i ku sosten di Ministerio di Salú públiko, medioambiente i naturalesa (GMN). E evento ta tuma lugá djaluna dia 20 di novèmber di 9 or mainta pa 12 or di mèrdia den oula di University of Curaçao. Partisipashon ta grátis, pero ta pidi interesadonan pa mèldu pa mas tardá dia 13 di novèmber pa por perkurá pa sufisiente lugá. Por registrá serka e kònsul honorario di Finlandia na Kòrsou, señora Helga Mensing: [email protected].
Aktualmente ta hasiendo e último trámitenan pa e programa di e mainta. Den dje a reservá tambe espasio pa orador lokal, esta Ir. Karel Tujeehut pa elaborá for di e perspektiva di regional riba e posibilidatnan di energia duradero. Na momento ku mas detaye di e programa ta kla, lo divulgá esaki.
