Eman na cabes di Utilities Aruba y di RDA

E conocido comerciante y desaroyado Richard Eman ta encabesa dos compania di Gobierno, como Presidente di Hunta di Comisarionan. Ta trata aki di e compania Utilities Aruba NV y tambe Refineria di Aruba NV. Den caso di e prome, e directiva cu normalmente tin 4 miembro, ainda tin solamente tres, esta Richard Eman, Harold Henriquez y Anthony “Ton” Rojer.

Mester menciona cu Richard Eman ta un arkitecto conoci, cu a desaroya varios proyecto riba nos isla. Un di su ultimo proyectonan ta Surfside Marina cu ta di dje mes. El a tuma e posicion over di Tom Pietersz cu tabata Presidente di e compania, representando Gobierno como e doñonan. Den e directiva actual a postula tambe Harold Henriquez, ta un Fiscalista y den pasado a ocupa e puesto di Minister Plenipitenciario na Washington, DC pa Gobierno di Antias. E tabata tambe Director di Utilities NV den tempo di Gabinete di Nel Oduber. Anthony “Ton” Rojer ta un comerciante, conoci specialmente pa maneha negoshinan den Freezone. Den mundo di Horeca tambe e tabata masha exitoso, esta tempo di Choose a Name. E ta casa di un di e coordinadornan di Minister Presidente Evelyn Wever.

Na Refineria di Aruba NV tambe a bin cambio. Di Franklin Hoevertsz como Presidente awor a bira e mesun Richard Eman. E ta conta tambe cu apoyo den directiva di Gilberto “Juni” Croes, conoci den mundo financiero pero awendia doño di Domino’s Pizza. Franklin de Kort RA, un regiester accountant y Marlon Werleman, tambe for di e mundo financiero pero tambe tabata Presidente di Parlamento den Gabinete di Nel Oduber.

Tanto RdA NV como Utilities Aruba NV ta companianan cu ta pertenece 100% di Gobierno di Aruba. Den ambos directiva tin luga pa un miembro mas, cu ainda Gobierno lo mester anuncia of scoge.