Riba 11 di yüli 2017, 12 di novèmber 2018 i 12 di sèptèmber 2019, Parlamentario Rozendal a manda karta pa Minister di Hustisia den kua e a hasi varios pregunta tokante institushon di un asina yamá “Pedowatch”. Basá riba kontestanan risibí, e Parlamentario por konkluí ku no ta dunando e atenshon debido òf no ta mira e prioridat den un mekanismo manera PedoWatch. E mekanismo aki mester tin komo meta pa evitá ku muchanan ta bira víktima di abusu seksual i tambe pa registrá pedofil òf personanan ku tendensia di pedofilia. Asina, por ehèmpel, organisashonnan ku ta traha ku mucha por verifiká si un persona ku ta traha/bin traha ku mucha tin antesedente si òf no.
Resientemente atrobe komunidat a tuma nota di un kaso kaminda a detené un sospechoso di aktonan di pedofilia. Pa años e sospechoso tabata ‘bou di radar’ i den kontakto ku mucha i hóbennan sin ku tabata tin bista riba dje. Rozendal ta di opinion ku outoridatnan kompetente i profeshonal mester atendé ku e fenómeno aki. Esta pa medio di un mekanismo manera “Pedowatch” kaminda instanshanan i outoridat kompetente tin bista riba e hendenan aki i por evitá muchanan bira víktima. No por keda wak i protehá interes di e pedeofil riba esun di e víktima segun Rozendal
Rozendal a indiká kon na hermana isla Aruba algun dia pasá un multitut enorme a marcha pasífikamente pa demostrá ku nan ta kontra abusu di mucha. Gabinete Wever Croes a duna su kompromiso na e pueblo di Aruba ku e ta bai atendé e fenómeno aki debidamente.
Den e kuadro aki Rozendal a manda un karta pa Minister di Hustisia pa sa dikon e Pedowatch no ta keda instituí pa kaba.
