Elsa Rozendal di MAN: Ta bon pa sa ken bo tin den kas

Resientemente un damita menor di edat a hui for di un internat i durante un entrevista na un planta di televishon a duna di konosé den e entrevista ku tin kosnan ku e a eksperensiá ku no por mira lus di dia.

Na promé lugá, mester laga hasi un investigashon i duna e hóben e guia nesesario.

Mas importante ta ku mester bini un registro kaminda tur hende ku ta traha ku mucha i hóbennan menor di edat òf kuida mucha (pleeggezin) ta registrá. Tambe concierge, stazjèr, e persona ku ta hasi limpiesa i boluntario. Asina Gobièrnu kontinuamente por skrin e trahadó aki. Si bo ta traha na un sentro pre-eskolar, klup di deporte, internat òf JJIC, bo mester ta den e registro aki i kumpli ku e rekisitonan. Asina mester entregá por ehèmpel un papel di bon kondukta (VOG). Ta bin aserka ku si e persona aki no ta inskribí na e registro aki, e no por traha ku mucha.

Parlamentario Rozendal ta urgi e minister responsabel pa tuma e akshon nesesario i implementá e registro aki i asina salbaguardiá interes i bienestar di nos muchanan.