Kada parlamentario por hasi uso di e asina yamá “initiatiefrecht”, pa bini ku inisiativanan di lei. Pero tambe un parlamentario tin ku atendé leinan ku ta bini Parlamento pa aprobashon. Sin embargo, segun Rozendal nos tin hopi leinan den nos pais ku ya kaba ta na vigor pero ku nos no ta hasi uso di nan optimalmente òf no ta semper konosí serka komunidat di nan eksistensia.
Nos leinan tei pa kumpli ku nan i tambe pa protehá e mucha, trahadó i nos
hendenan en general i garantisá un estado di derecho. Rozendal ta di opinion i basá riba su áreanan di enfoke, ku tin tres lei importante pa desaroyo di un mucha i su derechinan. Segun Rozendal sea mester evaluá, adaptá, ehekutá òf konsientisá komunidat mihó riba nan eksistensia. Rozendal a manda karta pa ministernan konserní pa atendé ku e 3 leinan aki.
1. Lei di BION. E lei aki a drenta na vigor na 2014 i mester stimulá dunadónan di
trabou pa tuma hóbennan entre 18-30 aña na trabou a kambio di insentivonan
fiskal. E lei aki mester keda evaluá despues di 3 aña i segun Rozendal, si ta
nesesario, mester adapt’é pa e sirbi e meta optimalmente p’asina duna
oportunidat real na nos hóbennan pa haña trabou. Rozendal ta di opinion tambe
ku mester agregá hende ku limitashon pa nan tambe haña mas oportunidat
laboral.
2. Lei di Maternidat ta duna e mama e derechi pa kòlf òf duna yu lechi na pechu
bou di ora di trabou. Mester konsientisá e mama trahadó i dunadónan di trabou
mas riba eksistensia di e lei aki i benefisiosonan di lechi di pechu pa un mucha su
desaroyo. Minister di Salubridat Públiko, Medio Ambiente i Naturalesa tambe
ta rekonosé e benefisiosonan i importansia di e lei aki. Minister di Desaroyo
Sosial, Labor i Bienestar tambe ta rekonosé ku mester duna mas informashon
tokante e lei aki. Awor ta kuestion ku mester bini kampañanan di
konsientisashon.
3. Lei di Paternidat (“Aanwijzing Vermoedelijke
Verwekker”): un lei pa responsabilisá tatanan pa rekonosé
i kria nan yunan. Un inisiativa di lei di SEDA (Sentro di
Dama) pero ku tin 4 aña pegá den e mulina gubernamental. Durante e simposio di
djamars último,“20 jaar Kinderrechten in Curaçao”, tambe a toka e importansia di
e lei aki. Minister di Hustisia mester pone e lei aki komo un di su prioridatnan.
P’esei Parlamentario Rozendal a manda un karta di rapelashon pa e minister di
hustisia pa kontestá preguntanan ku e parlamentario a hasi tokante e lei aki.
