Elsa Rozendal di MAN: Kon prepará Kòrsou ta pa Trabounan di Futuro

Segun sifranan di Central Bureau voor de Statestiek (CBS) i pa motibu di e último desaroyonan den kuadro di Covid, desempleo den nos pais ta na un nivel di 46 porshento.

Banda di e oumento di desempleo alarmante aki, nos tin ku tene kuenta tambe ku mundialmente, desaroyonan teknológiko riba tereno di Inteligensia Artifisial, Robotics i Automatisashon ta pone ku mayoria di trabounan ku nos tin awor aki ta bai kambia dentro di 5-10 aña.

Esaki ya kaba ta e kaso na hopi paisnan rònt mundu manera Merka i na Oropa i serka nos a kuminsá yega nos pais kaba pa motibu di Covid.

Si nada no keda hasí pa prepará nos hendenan, esaki lo nifiká ku desempleo na Kòrsou lo por subí na nivelnan nunka bisto.
Mester tene kuenta ku trabounan manera, kahera, trahadónan den area administrativo, mekániko, karpinté, security guards, tur ta ehèmpel di trabounan ku ta kore peliger di keda eliminá den futuro dor di avansenan teknológiko.

Pero tambe nos por mira trabounan nobo manera, por ehèmpel, agrikultor di e sistema di Aquaponics i Hydroponics.

Nos mester kuminsá no solamente prepará nos hendenan ku tin un trabou na e momentunan aki pa nan por sigui funshoná ora e desaroyonan teknológiko aki alkansá nos teritorio sino tambe
mester prepará nos muchanan for di ora nan ta den bankinan di skol pa nan tambe por haña un Trabou di Futuro.

Nos ta di opinion ku Minister di Labor huntu ku Gobiérnu mester kuminsá duna e tema di e efektonan di desaroyonan teknológiko riba kuponan di trabou e importansia nesesario. Nos no por warda te ora ta lat.

Djaweps awor den un reunion di Parlamento lo debatí ku Minister di Labor riba e tópiko di ‘Future of Work’