Elsa Rozendal di MAN: E Agènda Sosial mester karga sosten di henter komunidat

E situashon sosial-ekonómiko na Kòrsou ta di hopi prekupashon. Hopi kas di famia tin e difísil. Tin un desempleo haltu i problemanan sosial ta grandi. P’esei Rozendal ta kontentu ku a bini fondo disponibel pa kuminsá ehekutá e agènda sosial.

Segun Rozendal, e diferente proyektonan ku tin ku keda ehekutá den e Agènda Sosial ta amplio. Tur ta importante pero mester skohe e proyektonan di prioridat ku por trese un alivio mesora pa pueblo, espesial pa esnan mas débil den nos komunidat. Mester atendé, por ehèmpel, ku situashonnan di muchanan ku nò tin kuminda, kasnan ku nan awa i koriente ta kòrtá, guia pa yega na trabou i leinan laboral ku mester keda adaptá òf ehekutá debidamente pa mas protekshon pa e trahadó.

Rozendal ta di opinion ku nò ta e minister so òf parlamentarionan, sino gruponan sosial i henter komunidat mester karga i apoyá e Agènda Sosial aki pa su implementashon ta eksitoso.

Asina nos por logra atendé realmente ku e retonan sosial den nos pais ku ta redundá den un adelanto pa tur siudadano.