Elsa Rozendal di MAN: Bou di ningun sirkunstansia por mishi ku mucha

Kasonan di maltrato òf abusu kontra di mucha lastimamente ta oumentando den nos pais. Resientemente nos por a tuma nota te asta ku un maestra di skol a fisikamente maltratá un mucha di apenas 5 aña di edat.

E ta kousa un konsternashon mas grandi serka nos si e agresor, den e kaso aki, ta un maestra di skol. Un maestro di skol ta un persona ku mester duna ehèmpel i hamas por pone man riba un mucha. Sigur no den presensia di otro muchanan.

Algun tempu pasá Parlamentario Rozendal a manda karta pa Minister di Hustisia i Minister di Desaroyo Sosial, Labor i Bienestar ku e rekomendashon pa bini ku un “Registro di Persona” pa registrá tur persona ku ta traha ku mucha na entre otro sentronan pre-eskolar, klup di deporte, internat i skolnan. Ta sumamente importante pa sa ken ta esnan ku tin akseso na mucha i kiko nan estado mental ta. Ku un “Registro di Persona” bo no ta solamente sa ken e personanan aki ta, bo por monitoriá nan i sa si nan tin antesedente. Tambe e persona mester entregá un “Bewijs Omtrent Goedgedrag” i un “Psychologische Verklaring”. Si e persona aki no ta registra e no por traha ku mucha.

Parlamentario Rozendal a indiká tambe ku su frakshon ta trahando riba un inisiativa di lei ku ta hasi e kastigu pa maltrato mas severo ora ku e maltrato ta tuma lugá den presensia di mucha.