Elsa Rozendal di MAN: Ainda no tin solushon pa situashon indeseabel di awa ku ta keda para dilanti sentro pre-eskolar

130

Parlamentario Rozendal a manda karta pa Minister di VVRP, señora Zita Jesus-Leito, pa pidi atenshon pa un situashon den Dominguito, pa ta mas eksakto den Granaatappelweg, kaminda awa ta keda para dilanti un sentro pre- eskolar i konsekuentemente ta trese hopi molèster pa mucha, mayor i trahadó di e sentro pre-eskolar en kuestion i habitantenan di e kaya. Tambe e kaya ta den hopi mal estado.

Apesar ku e Minister a primintí solushon, Rozendal ta konstatá ku te ainda nada no a sosodé i ku te asta e burakunan den e kaya en kuestion a bira peor. Parlamentario Rozendal a pidi un biaha mas atenshon pa solushon di e situashon indeseabel aki sigur mirando ku nos a drenta temporada di awa.

Mas aun e parlamentario a pidi atenshon pa e situashon pasó e Minister mes, komo kontesta riba e di dos karta ku e parlamentario a manda, fechá 29 di yanüari 2019, e minister tabata di akuerdo ku e parlamentario ku mester evitá molèster pa muchanan ku ta frekuentá sentronan pre-eskolar i skolnan. Tambe den mesun karta, e Minister a indiká ku ta bai atendé ku e problemátika den Granaatappelweg i ku Obra Públiko ya kaba a traha riba un diseño pa aliviá e molèster di awa den e kaya en kuestion. E parlamentario a bolbe manda un karta pa e minister pa sa ki dia habitantenan di Granaatappelweg i e pober muchanan ku ta bishitá e sentro pre-eskolar por haña alivio i por mira solushon.