ELMAR: Contratistanan a causa interupcion di coriente awe

Awe mainta alrededor di 10:00am tabatin un interupcion den e suministro di coriente den area di Oranjestad. Tecniconan di NV Elmar a mobilisa pa busca e causa di e interupcion abrupto. Na altura di Biblioteca Nacional a constata cu un contratista haciendo trabao di excavacion pa SETAR N.V., a dal y ocasiona daño na un kabel di tension halto di NV ELMAR.

A haci e cambionan necesario den e red de distribucion di coriente pa isola e problema y reestablece suministro di coriente den e areanan afecta. Rond di 11:00am tur cliente den e area afecta a haya coriente bek. Mientrastanto ELMAR lo traha pa reemplasa e kabel cu a sufri daño.

Sinembargo, awe merdia un biaha mas alrededor di 2:30pm tabatin un otro interupcion di coriente den area di Punta Brabo. Na altura di “Divi Village Golf & Beach Resort” e contratista cu ta trahando riba Watty Vos Boulevard a causa daño na un kabel di tension halto di ELMAR. A haci cambio necesario den e red di distribucion di coriente y alrededor di 2:50pm tur cliente den e area afecta a haya coriente bek. Den e caso aki tambe ELMAR lo traha pa reemplasa e kabel cu a suftri daño.