Asociacion Welcome Plaza tabatin un reunion cu directiva di Departamento di Infrastructura y Planificacion (DIP). Ta bay haci traspaso di Welcome Plaza na un otro instancia y tanto e asociacion como comerciantenan aki no ta involucra den dje.
Elizabeth Guanipa, presidente di Asociacion Welcome Plaza, a splica despues di cuater aña den comunicacion cu DIP p’e asuntonan amplio cu ta bay fo’i estetica dje luga, con e no ta dunando cara pa Aruba como destino turistico. Durante pandemia a cuminsa cu e parti cu e plasa a keda cera pa diescinco luna y nan tabata pidi pa un dispensacion dje huur ey. Tambe un tarifa solidario te ora turismo crucero yega n’e nivelnan cu tabatin antes. Nunca nan a haya un contesta.
Cuater aña, a pesar cu e comunicacion nunca a yega na nada concreto, nunca a yega n’un resultado un solucion. Pero awe, 23 di november 2023, segun Guanipa, DIP ta informa nan cu e decision a cay na nivel Gabinete Wever-Croes II riba e maneho di Welcome Plaza. Esaki ta significa cu Welcome Plaza ta bay pasa p’un otro instancia.
Pa basta luna caba tin rumor cua instancia cu ta interesa, mientras cu DIP no kier a confirma esaki. Ta un posibilidad cu DIP no ta den capacidad pa haci esey, pero Guanipa a sigui indica cu esey no ta e asunto cu ta mas preocupa nan.
Nan ta dispuesto pa tin un traspaso tanten cu e por yuda e comerciantenan aki yega na un solucion pa tur e asuntonan cu nan tin pendiente. Locual ta preocupa nan enormemente ta cu no ta involucrando Welcome Plaza den e traspaso aki.
