Cantidad di persona a subi caya diasabra marduga pa gosa di e Jouvert Morning. Sin duda e participantenan a demostra cu nan a sinti falta di e ambiente.
UN JOUVE NA SMAAK DI SMAC
Cherryldine Buckley, di SMAC, a comenta cu maske dos banda so a forma parti di Jouvert Morning toch tabatin un cantidad grandi di persona riba caya. “E dos bandanan, Tsunami y Groove Masters, tin un zonido increibel”, Buckley a enfatisa. Ambos banda tabatin basta personanan tras. Mike’s Disco y Grill21 tambe a forma parti di e parada.
Por ultimo Cherryldine Buckley a comenta cu sin duda e Jouvert Morning tabata na “smaak di SMAC” mirando cu e ambiente tabata tremendo.
CRECIENDO..
Elvis Wester, un fiel participante di Jouvert Morning pa mas cu dies aña, a comenta cu Aruba tabata en espera y por fin a yega pa nan por gosa. Si compar’e cu aña anterior e Jouvert Morning ta birando mas grandi mirando cu tin hende ta bin di afo pa nan participa.
RECORD…
Maicky “Campo” Oliva a experencia un ambiente dushi y cu hopi hende riba caya. Inicialmente por a wak cu e tabata mustra di ta un Jouvert Morning chikito cu tiki banda musical pero hopi participante. Diasabra mainta sigur a bira un record den asistencia pa Jouvert Morning.
E aña ‘ki te ainda ta bayendo hopi bon. Tin hopi grupo bunita y luhoso. Campo a comenta cu awe nochi lo mira e gruponan sali den full force durante Lighting Parada Oranjestad. El a continua bisando cu e paradanan di mucha tambe a bay nechi. Alabes e festivalnan tambe a bay tremendo pues te awo por bisa cu tur hende ta satisfecho.
SAN NICOLAS TA JOUVERT
Allison Williams, di Massive FM, a duna di conoce cu tanto e evento prome cu Jouvert Morning como J’ouvert Morning mes tabata tremendo. Williams a calcula cu tabatin mas cu ocho mil hende riba pia. “San Nicolas ta Jouvert”, el a termina bisando.
CARNAVAL
Aruba a cuminsa celebra carnaval desde aña 1944, tempo di Tivoli Club, despues di dos guera mundial. Desde aña 1954 a cuminda organisa varios evento chikito y na 1955 a eligi e prome reina di carnaval. Paradanan grandi a cuminsa na aña 1957. Pero tabata dia 11 di november 1966 cu a funda Stichting Arubaanse Carnaval, SAC. El a organisa carnaval te na aña 2014. E aña ey gruponan a funda Stichting Maneho di Aruba su Carnaval (SMAC) cu a sigui organisa tur parada y evento carnavalesco. Desde aña pasa Darren van Ommeren ta na cabes di e fundacion, cu ta posee e permiso general pa organisa carnaval riba nos isla.
