Ministerio di Desaroyo Ekonómiko (MEO) huntu ku empresanan di kooperativa i pueblo di Kòrsou a selebrá Dia Internashonal di Kooperativa.
Anualmente kooperativanan rònt mundu ta selebrá Dia Internashonal di Kooperativa riba e promé djasabra di yüli. E aña aki e fecha a kai riba djasabra 7 di yüli i e e tópiko pa e selebrashon tabata “Konsumo i produkshon duradero di produktonan i servisionan” .
Anteriormente e tópiko pa e selebrashon tabata keda skohé tur aña pa e organisashon madre ku yama International Cooperative Alliance (ICA) huntu ku Nashonnan Uni. E aña aki tabata e promé aña ku e tópiko a keda skohe públikamente pa medio di un votashon riba Twitter. Ku e slogan di e aña aki e intenshon ta, pa mundu sa ku ta posibel pa nos komunidat krese ku demokrasia, igualdat i hustisia sosial.
Kòrsou tambe a djòin den e selebrashon aki i huntu ku kooperativanan lokal a pone atenshon na e Dia Internashonal di Kooperativa pa medio di un selebrashon kombiná ku diferente spich i presentashon ku a tuma lugá na Hotèl Kura Hulanda. Durante di e selebrashon aki por a konta ku partisipashon di diferente kooperativa lokal di spar i krédito, kooperativanan lokal di produkshon i servisio pero tambe organisashonnan públiko i priva di interes i institutonan di konosementu.
Na e mesun okashon a hasi uso di e oportunidat aki pa selebrá tambe e echo ku pais Kòrsou pa medio di MEO a bira ofisial un miembro asosiá di ICA. Miembresia na ICA ta nifiká ku awor nos pais lo tin akseso muchu mas fásil na desaroyonan riba tereno di kooperativa den otro paisnan rònt mundu. Tambe e miembresia ta brinda e fasilidat pa nos por interkambiá ideanan, konosementu i eksperensia riba tereno di maneho, legislashon i bon práktikanan di maneho pa kooperativanan. E miembresia aki ta nifiká tambe ku nos lo por netwerk konosementu, informashon i komersio riba nivel internashonal i nos ta risibí akseso na publikashonnan di ICA, materialnan di referensia, programanan di training, workshop i konferensia nan i otro eventonan temátiko.
Selebrando e Dia Internashonal di Kooperativa e aña aki, anunsiando tambe e laso nobo ku ICA i presentando un plan stratégiko di kon lo bai desaroyá empresanan di kooperativa na Kòrsou dor di nos Minister di Ekonomia, Dr. Steven Martina, ta solamente un inisio di e determinashon di e Gobièrnu aktual pa ehekutá parti di su plan di Gobernashon ku tin atenshon dirigí riba desaroyo di Kooperativa i e kontribushon ku esaki por tin na desaroyo sosial ekonómiko d Kòrsou.
