Eksaminashon preventivo di kanser na pechu: “Un privilegio den sektor di kuido di salú”

For di 20 di novèmber di aña pasá Fundashon Prevenshon ta disponé di un aparato di mamografia, ku lo duna hopi hende muhé oportunidat pa hasi un skèn preventivo i sin ku tin gastu mará na esaki.

Ta  hasiendo uso di e aparato akí kaba, pero dia 14 di febrüari 2019 ta entreg’é simbolikamente na spònser- i invitadonan durante un resepshon. Atkisishon di e aparato pa hasi mamografia akí  a bira posibel ku sponsership amplio di parti di Orco Bank, Prinses Wilhelminafonds, Rotary Foundation, diferente klup di Rotary den reino, i Jamaica.

Banda di esaki e proyekto a risibí sosten finansiero di personanan privá i di diferente fundashon i kompania  na Kòrsou, Aruba Ulanda i Sürnam.

Ta eksistí hopi ignoransha tokante e nesesidat di eksaminashon  preventivo di pechu. FP huntu ku  Rotary  Club Willemstad i Curaçao ta traha riba un kampaña informativo pa motivá e hende muhé entre 45-75 aña pa laga hasi un eksaminashon preventivo.

Loke nos no konosé nos no ta gusta”

Esaki ta konta sigur sigur pa hopi hende muhé ku pa motibu di falta di konosementu òf miedu no ta reakshoná riba invitashon di Fundashon Prevenshon pa bai hasi un eksaminashon preventivo di pechu. A base di informashon ku Kranshi ta ofresé, FP ta invitá tur hende muhé entre 45 pa 75 aña pa kada 2 aña nan bin hasi un mamografia sin ku tin gastu mará na esaki. Al final mas o ménos 50% di e hende muhénan ku risibí un invitashon ta bini pa laga hasi e skèn. Hopi hende muhé no tin solamente miedu di e resultado, pero tambe di e doló ku e eksaminashon lo ta hasi.

Durante desaroyo di e aparato di mamografia nobo a dediká hopi atenshon na e eksperiensha desagradabel di e hende muhé ku a yega di laga hasi un skèn. Eksaminashon ku e aparato nobo ta ménos inkòmodo, ta duna mihó resultado i ta mas dushi den uso.

Den e grupo ku FP ta enfoká riba dje  ta eksistí hopi konfushon tokante nesesidat di un mamografia. Nan no ta realisá ku ora konstatá kanser na pechu demasiado lat, esaki  por tin konsekuensha fatal i  un impakto grandi riba e famia i nan ambiente. E kampaña di informashon ke stimulá e hende muhé pa laga hasi un mamografia. Kuida otro ta un dje pilanan importante den komunidat di Kòrsou. P’esei lo ta bunita si mama i yu muhénan stimulá otro pa reakshoná riba invitashon di FP  i laga hasi un mamografia. Transporte pa bai hasi e eksaminashon no ta un problema. FP ta disponé di un servisio di transporte ku por buska i hiba e damanan di Banda Riba te Banda Bou.

Mamografia

Un mamografia ta un potrèt di rüntgen di e pechu ku ta usa pa diskubrí posibel desviashon. Pa medio di e eksaminashon por diskubrí kanser na pechu trempan, asta promé ku tin keho òf ku por fula òf mira e kanser na pechu. E chèns riba plamamentu di e kanser ta bira mas chikitu i ta hasi  eventual tratamentu mas efektivo i ménos intensivo. Sifranan resien ta mustra ku ora diskubrí  kanser na pechu trempan ta oumentá e chèns di kurashon. E mashin nobo ta kapas di traha un imáhen tresdimenshonal di tehido di e pechu, i ta saka potrèt for di diferente ángulo. E bentaha, kompará ku e imáhen ku e mashin dosdimenshonal ta saka, ta ku por siñalá desviashon mas trempan. E eksaminashon total ta dura  mas o ménos 15 minüt. E dòkter di kas ta risibí e resultado i ta papia tokante  esaki ku e pashènt. Den kaso di duda òf un resultado negativo ta sigui un di dos mamografia kaminda  dòkter ta studia e sitio konserní mas detayá, un ekografia òf un MRI.

Fundashon Prevenshon

Huntu ku señor Lionel Capriles, señor  profesor Dr. H.M. Pinedo ta fundadó di Fundashon Prevenshon (2009). E tin un kuríkulo impreshonante, a risibí diferente kondekorashon riba tereno di onkologia klíniko, terapia pa kanser, kuido di pashènt di kanser i te ainda ta traha komo onkólogo. A rekonosé su trayektorio ku e título Ridder in de orde van de Nederlandse Leeuw i “Commandeur in de Orde van Oranje Nassau”. FP ta orguyoso ku un persona ku asina tantu rekonosementu ta pará na kuna di nan organisashon. E tim spesial akí, profeshonalmente di trein ( i ku ta konsistí di laborantnan médiko di imáhen, radiashon i screening ) ta pará kla diariamente pa trankilisá e damanan i hasi e skèn un eksperiensha mas agradabel posibel.

Regularmente  nan ta sigui kurso adishonal pa amplia nan konosementu. Na mei 2019 FP ta muda bai den e edifisio na Molenplein ku anteriormente tabata di kuerpo polisial. For di e

edifisio bunita  akí e organisashon ta spera di por yama hopi hende muhé bon biní.