Diadomingo ultimo, net prome cu nos fiesta nacional di Himno y Bandera, a tuma luga e prome Car Rally Scavangers Hunt “Conoce bo isla” organisa pa emisora di Cultura di Aruba, Radio Bo Guia 88.9 F.M. E evento a conta cu sosten di SETAR y FMSA. E ekipo “4 Cabes un Celebro” consistiendo di 4 dama a bay cu e premio maximo mientras cu Bo Guia FM a premia 9 finalista, auto miho decora, grupo mas anima, grupo miho uniforma y grupo cu menos punto.
“Conoce Bo isla” ta un proyecto pa comunidad, organisa den un siman di tempo. Participantenan a dorna nan auto, uniforma nan mes pa hunto den famia core tur rond di nos dushi isla.
E parti mas importante di e proyecto ta ora participantenan mester a bishita, saca potret y post riba FB e baluartenan scogi e aña aki pa Radio Bo Guia, den persona di Evelino Fingal; diseñado di nos moneda y placa di papel; Maybeline Arends-Croes; cu mas di 50 aña dirigiendo coronan di mucha y adulto; Belen Kock-Marchena; poeta y educado di hopi lider den comunidad; Harry Croes; organisado pa mas cu 40 aña di festival di Dande, Tipico y Himno y Bandera; Ito Tromp; un persona cu nos mester di introduccion.
Durante e recorido a bishita varios luga historico, ademas di a bini cu varios pregunta relaciona cu simbolonan di identidad di nos pais. Un di e preguntanan mas dificil tabata unda e prome dump tabata ubica na Oranjestad. Como opdracht mester a busca, entre otro, telefon di schijf, carchi telefon bieu di Setar, celular cu antena, logo bieu di Setar. Mester a menciona parti di historia di refineria, pomp stacionnan, pinta logo do FMSA, etc. Mester a finalisa varios dicho popular na Papiamento y mester a cana den Nassaustraat mencionado varios negoshi cu ya no ta existi mas. Participantenan mester a saca potret y publica riba Facebook di Radio Bo Guia.
Mester menciona cu FMSA- Fuel Marketing Supply Aruba a regala 25 bon di gasolin na e prome 25 gruponan cu a registra y participa na e Car Rally Scavangers Hunt. Mientras cu Setar a regala e grupo ganado un celular pa cada miembro di team “4 cabes un celebro”. Esunnan cu a clasifica a ricibi masha premio for di e patrocinadonan.
E ganadornan ta e siguiente gruponan:
- Ganado absoluto: 4 Cabes Un Celebro
- Na di 2 luga: Team Ambiente
- Na di 3 luga: Peluche
- Na di 4 luga: Raspa caya gang
- Na di 5 luga: Triki girls
- Na di 6 luga: Shoco Team
- Na di 7 luga: Smarties
- Na di 8 luga: Ami so den boso
- Na di 9 luga: 7 Pikete
- Na di 10 luga: Team Geerman
- Auto miho decora: Raspa Caya Gang
- Grupo mas anima: 297 girls
- Grupo miho uniforma: Ami So den Boso
- Grupo cu menos punto: Jake’s Pirate Team