Edwina Werleman: MUSICA ta sostene decision di SMAC

Recientemente SMAC a anuncia cu lo cancela carnaval di otro aña y cu lo tene un evento pa recauda fondo na luna di juli 2021. Stichting Musica ta aclaria cu e conseho di nan parti ta a base di reunion y participacion cu tur lider di banda, asina Edwina Werleman, Presidente di Stichting Musica a duna di conoce.

E actividad den forma di fundraising na juli 2021, ta como parti di e eventonan cu SMAC a propone tentativamente. Durante evaluacion cu band leaders, a toca e tema di e festval pa ambos aña 2021 y 2022 y e mayoria a conclui cu nan ta di acuerdo pa pospone Carnaval y consecuentemente e festival y competencia musical pa aña 2021. 

A palabra cu primordialmente e musiconan y tambe cu SMAC, cu ta prudente pa evalua hunto cu tur stakeholders e decision aki despues di 2021. Di e forma aki por mira si e cambio di fecha ta exitoso y bonbini pa sigui pa e siguiente aña(nan) of si lo mester ahusta e fecha bek pa comienso di aña. 

Stichting Musica ta gradici tur band leaders pa nan aporte na e evaluacion y decision aki y ta spera di por continua cu un bon cooperacion y comunicacion cu SMAC y Gruponan Uni pa haci nos siguiente Carnaval y Aruba Caiso & Soca Monarch uno exitoso.