Dialuna ultimo, Edwina Matos-Pereira, Manager Strategy & Planning di Banco Central di Aruba, a pasa di ta drs. Edwina Pereira, pa bira Doctor Edwina Pereira. El a promove na Universidad di Groningen, bou guia di Profesornan renombra den Economia, Profesor Doctor Bert Steenge y Profesor Doctor Jakob de Haan. E ultimo aki ta, fuera di Profesor, hefe di e departamento di “research” di “de Nederlandse Bank” y un academico renombra mundialmente. Ambos Profesor a elogia Edwina pa su conocemento, abilidad y actitud di trabao cu el a desplega durante su trayectoria pa bira Doctor den Economia.
E tema di Edwina su “proefschrift” ta “Small and Smart: An exploratory analysis of economic institutional choices of small countries and territories in the Caribbean”. Distinto na hopi publicacionnan academico riba paisnan Caribense, Edwina no solamente a enfoca riba e partinan negativo di ta un pais chikito, pero tambe a mustra cu e hecho cu e paisnan chikito aki tin hopi reto pa enfrenta, ta haci cu nan ta siña e abilidad pa adapta na e retonan aki. Un tema cu Edwina a explora extensamente bou di e nomber ingles, “resilience”. Pesey e titulo di su “proefschrift” ta “chikito y sabi”.
El a substancia su ponencianan den forma extenso cu datonan, encuestanan, y estudionan academico cu el a defende exitosamente dilanti un panel di profesornan di diferente universidad Hulandes y di otro pais rond mundo.
E carera profesional di Edwina Pereira a cuminsa 26 aña pasa na Hulanda na Moret Ernst & Young, unda e la traha como Assitant Controller, despues di esaki el a traha na Banco di Seguro Social, SVB, na Hulanda pa 3 aña. Na 1997 Edwina a muda pa Aruba, unda e la cuminsa traha na Centraal Bureau voor de Statistiek, CBS, pa 6 aña, unda e tabata hefe di Cuentanan Nacional. Desde 2003 Edwina ta traha na Banco Central di Aruba, unca cu el a ocupa diferente funcion den Banco, manera economista, deputy manager research deparment y awor Manager Strategy & Planning, unda cu e ta raporta directamente na Presidente di Banco Central, Jane Semeleer.
For di Banco Central, Edwina a haci diferente tarea adicional, manera duna les na Universidad di Aruba, como tambe ocupa un tarea clave den e ekipo chikito di Minister di Finanzas, Juan David Yrausquin, den e periodo 2013/2014. E ultimo aki a compaña Edwina durante su “promotie” como “paranimf”, hunto cu un otro colega anterior di Edwina di su tempo na CBS, Annemieke van de Steeg. Annemieke tamba e promoveer algun aña pasa na Groningen y a inspira Edwina pa e tambe cuminsa e trajecto aki. Remarcabel di Edwina su promotie ta cu e la haci esaki, banda di ocupa su trabao dificil y exigente na Banco Central.
Na e ocasion di su Doctorado, Edwina a wordo compaña pa su casa, Jeffrey Matos, su dos yiunan, Justin y Kimberly. Como tambe su rumannan, famianan y conocirnan. Presente tambe tabata su hefe, Presidente di Banco Central, Jane Semeleer, kende hunto cu Edwina y algun otro profesor a tene un simposio e dia siguiente riba e tema di paisnan chikito na Universidad di Groningen.
Por lesa e tesis di Edwina Pereira siguiendo e link aki.
