Tur hende por yega na FCCA. Segun Edwin Tromp, tur hende na porta di FCCA si nan ta desea di traha un cas, por ehempel financia, etc. Tin hende cu ta bay eynan pa cumpra un cas.
No necesariamente e mester tin un situacion social abao. Awo FCCA tin su normanan, nan rekerimentonan y si nan ta cumpli cu esey. Tin limite ora cu ta financia casnan cu ta hopi costoso, no ta bay den esey. No ta e intension di FCCA tampoco.
Si ta cosnan cu ta cay den nan normanan, sigur sigur, segun Tromp. Y ta haci esey tambe algun biaha.
Demanda
Aña pasa, entre Mei cu Augustus, a bolbe invita tur hende pa bin na FCCA. A saca afo awor aki cu tin 10% cu kier cumpra cas. No necesariamente kier huur cas. E demanda ta keda subi. FCCA so no por cumpli cu n’e tampco. Nan ta haci nan parti. Tin e presupuesto, tin e capacidadnan. Aña pasa FCCA a haci un refinanciamento, plus financiamento acerca pa por cumpli cu e proyectonan. Pero pa otro aña si kier bolbe traha, pasobra pa e aña aki tin pensa cu por yega na 100 pa 125 cas. Tromp no sa si tur lo bin cla, pero por lo menos a cuminsa cu nan y ta den construccion. Tambe ta conta e hendenan cu ta traha nan propio cas.
Otro aña, si kier haci esey of bisa cu ta bay mas hopi, vooral si bay bon cu prefab. Prefab tin dos cos. E ta un costo menos y e ta uza menos tempo. Bo por keda cla cu mas cos den menos tempo. E ora ey lo por bisa cu por hisa e cantidad. No sa si e ta yega 200. Pero tambe mester busca financiamento
Casnan social
Ora ta papia di casnan social, ta casnan cu hendenan ta huur. Cas cu hende ta cumpra, ningun hende no ta subsidia nan. Casnan social cu ta huur, gobierno tambe ta haci su parti. E ta subsidia e hende, semper y cuando e hende ta cay den e normanan di esey. Tin diferente condicion pa esey. Hende cu ta traha su cas, hende cu ta cumpra su cas, ta simplemente e financiamento e mester. Obviamente FCCA ta bay largo, pero esey Tromp no ta mira e parti social directo. Loke si ta un hecho, cu por ehempel e clase medio bay abao, ta busca casnan den 120 mil, por ta te 150. Si bo cumpra un tereno caba cu ta 40 mil florin, ya eynan si su capacidad di financiamento ta 140 mil florin, e tin cu traha un cas entre 80 y 100 mil florin.
Y esey no ta un cas grandi y esey tambe un motibo cu tin cu busca un otro alternativa pa construccion cu por yega na haci casnan cu ta un poco mas barata, pero di bon calidad. Esey ta hibabo tambe cu bo mester haci cosnan prefab.
Cumplimento di pago
Hendenan ta cumpli. Tin cu acepta cu FCCA ta deal cu hopi parti di dje. Nan ta deal cu e parti abao di comunidad. Por bisa cu di experiencia di Tromp, compara FCCA caminda cu el a semper di su bida cual ta banco, nan ta den un zona toch hopi bon. E no ta mucho mas halto cu banconan comercial.
