Durante un conferencia di prensa Stichting Karting Aruba a papia di e proximo biaha di un di nan miembronan pa competi den un careda internacional na Ecuador, cu e meta final di trata di yega na e careda mundial na Italia.
Chrislene Arends, representante di e organisacion, a splica cu for di aña 1997 nan tin e pista unda cu coredornan local por prepara nan mes, competiendo den caredanan, cu ta permiti nan participa den competencianan internacional.
Un grupo di boluntario a bin ta trahando recaudando fondo pa Edwin Arends jr., por tin tur cos cla pa participa den e proximo careda internacional na Ecuador. “Nos ta bisa masha danki na nos sponsernan, team y na tur cu a contribui cu nos rifa y nos a logra recauda tur fondo necesario pa participa den e Panamerican Rok Cup Challenge 2019.” E caredanan aki ta tuma luga na Latacunga, Ecuador, y ta cuminsa diaranson. E team a biaha diadomingo.
Edwin Arends jr., a participa den hopi careda y ta core for di mucha caba. Pero aña pasa a cuminsa traha riba plan na momento cu a tende di e competencia aki, pa e por participa. El a yega di core na Colombia, Panama y na varios otro pais Latino, pero tambe den caredanan internacional cu a tuma luga na Aruba.
Pa e competencia na Ecuador el a bin ta preparando su mes mentalmente, tanto riba pista, como ehercicionan fisico y inclusive ta train riba e simulator di caredanan. Esaki ta importante pasobra e lo ta enfrentando hopi Piloto Latino, kendenan tur kier gana e competencia. E ganado lo haya tur gasto paga pa competi den e careda mundial na Italia proximamente. “Nos tin hopi confiansa den Juni cu e lo ta e ganado,” Arends a bisa.
EDWIN ARENDS JR
Edwin Arends Jr. mes a bisa cu el a prepara su mes masha hopi pa e competencia aki, tanto riba como pafo di pista, di mainta te anochi. A traha hopi riba su concentracion.
E ta biahando cu su tata y ruman cu lo yud’e den e competencia, y tin un team di Colombia cu ta yud’e cu su vehiculo, den cual team el a core aña pasa.
Tin dos coredo mas di Aruba participando, kendenan ta Mathew Paesch y Haguen Orman. Nan ta competiendo contra pilotonan di 15 otro pais.
CHRISTOPHER ARENDS
Christopher Arends ta e mecanico di Junior y tin tur cos cla p’asina nan yega pone e vehiculo den funcion. Nan tin un chasis nobo, dos motor (Colombiano y Italiano cu a huur) y tin un mecanico Colombiano cu lo yuda nan den algun aspecto cu no tin experiencia.