Manera tur hende por a sigui riba medionan cu tin un asunto fastioso andando pa loke ta trata di un arma di candela di servicio di Aduana cu a disparce. A menciona cu cuater duanero a haya prohibicion di entrada pa asina Aduana y instancianan por haci e investigacionnan necesario.
Remarcabel ta cu presidente di SADA, Edward Maduro, tambe a haya e suspension aki. Esaki a bay na vigor diabierna siman pasa 6 di september, ora cu Maduro a subi warda. Aki el a haya un carta unda cu ta poni cu el a haya un prohibicion di entrada. Ora cu a bay tuma nota, e motibo pa kico e director of miho bisa Minister, mirando cu ta un carta di Minister, firma pa e director di Cuerpo di Aduana, Roderick Croes, ta cu el a haya un prohibicion di entrada.
Motibo cu ta poni den e carta pakico Maduro a haya prohibicion di entrada aki, ta debi cu dia 19 di juli, Maduro tabata programa pa traha e warda di 8’or di mainta pa 4’or di atardi. Den e carta di gobierno, firma pa e director, ta poni cu door cu el a traha riba e dia aki y no a traha un wachtrapport cu aparentemente tin un arma, despues di a haci un inventario riba e dia aki, desapareci. Ora cu a bay wak den e file di e wachtrapport cu tin na e seccion di waf, a bin tuma nota cu e wachtapport di dia 19 di juli, durante warda di Maduro, no tabata presente. Esta no a traha esaki.Maduro a enfatisa cu un wachtrapport normalmente ta trah’e na final di e warda. Loke a pasa durante henter dia, desde 8’or di mainta, te cu 4’or di atardi, ta traha e wachtrapport, pa asina e supervisor cu ta subi e siguiente warda, ta haya esaki, p’asina tur cos keda bon bao di control.Den e carta di minister firma pa e director, ta poni cu Maduro tabata negligente pa loke ta trata su responsabilidad como supervisor (dienstleider) y no a haci ningun tipo di melding cu falta un arma.
Manera cu Maduro a indica, riba e fecha ya indica, a haci un inventario y a resulta cu tabata falta arma. E inventario aki a wordo haci durante e dia, entre 8’or y 4’or.
E rueda di prensa convoca pa SADA, ta pa mustra cu tin un persecucion formal tras di Maduro of tras di e sindicato. Maduro kier a refresca memoria di tur hende cu na november 2018, a haya un rapport di e director, cu Maduro a saca dienstgeheim den prensa. Door cu Maduro ta den sindicato, cu no ta para keto ni keda keto pa ora cu tin cosnan robes ta bayendo, ta bin afo y mustra sin miedo kende tur of kendenan tur ta cometiendo un of otro fayo.Si dado caso, manera cu tur sa, e director na varios ocasion a haci varios fayo, sindicato a sali y a denuncia esaki publicamente sin miedo. Na november, despues di varios biaha a duna entrevista, e director a haya ta bon pa raporta Maduro, keriendo cu asina por silencia nan. Despues di casi un aña, no sa unda e rapport aki ta. Te dia di awe, Maduro no a haya chens pa reacciona riba esaki. Ta como sifuera cu esaki a bay den doofpot. Ta algo hopi straño y no comun, cu ora bo ta haya un rapport, esaki ta disparce y no ta tende nada mas riba dje. Pa Maduro, e rapport aki a bay den doofpot, es decir cu no ta existi mas.
Den reunion
Pa loke ta e di dos caso, a splica lo siguiente. Riba dia 19 di juli, henter dia tabata den reunion cu minister di finansas, for di 11’or di mainta. SADA mes tabata tin un reunion interno pa 10’or di mainta, unda cu e director mes a duna permiso, por medio di un email, unda cu a pidi permiso pa por reuni mas tempran cu normal. Maduro no tabata na trabao dia 19 di juli y aki por mira cu e director, no ta importa pa busca informacion corecto y veridico, pero ta busca manera pa persigui Maduro y purba di atacha su nomber, mustrando falta di integridad.
E suspension aki ta dirigi pa Maduro. Si e director a haci su trabao manera mester ta y saca afo e hechonan, e minister di finansas, cual ta laga e director aki haci y deshaci, nan lo por a mira riba Facebook, unda cu e minister mes ta indica cu dia 19 di juli, sindicato tabata den reunion cun’e y despues di e reunion cu a caba banda di 1’or y mey di atardi, tabata tin un momento cu tabata tin cuater hubilario cu a cumpli 40 aña den dienst. Riba e dia ey, Maduro ey, practicamente no a traha. Con e director por culp’e di ta negligente na trabao, siendo cu e no tabata t’ey. Esey ta pasa cu ora pa mas cu un aña caba ta pidiendo e minister di finansas pa duna nan un tipo di ter beschikking p’asina nan por tin tempo pa sindicato. Pero nunca no a haya oido di e minister, ni su bendicion, manera otro sindicatonan si ta haya cooperacion di e departamento y e minister. Sindicato no ta un trabao facil, ta un trabao cu ta exigi hopi. Mayoria di esaki ta durante oranan di trabao y oranan liber, mirando cu nan ta traha warda. Tin ora tin cu bay reunionnan henter dia cu minister, cu departamentonan, cu leiding mes, cu hopi biaha ta sosode den oranan liber. Ey por mira cu comosifuera hinca nan den un spot dificil, unda cu e director a core duna un prohibicion cu bendicion di e minister, siendo cu Maduro no tabata na trabao. El a splica den e conferencia cu e tabata den Bestuurskantoor hunto cu e minister y durante e acto di hubilario. Esaki, Maduro ta considera, manera ya indica, ta un persecusion su tras.
