Awe Sindicato di Aduana Aruba a sali pa demostra e malcontento cu ta existi den e Cuerpo di Aduana como tambe ful e departamento publico, semi-publico como tambe e pensionadonan pa loke ta trata e tema di e 12.6% corta den e salarionan. Ya pa varios luna ta discutiendo e topico aki, Edward Maduro a menciona cu e ta un topico ’ticklish’ pasobra hopi ta bisa cu loke ta sosode awor no ta ‘terecht’ mas pa motibo cu FASE a stop.
Manera a indica, FASE tabata e motibo di e recorte den salario. E trahadonan ta sinti cu ya no mester corta mas. Maduro a splica cu no ta tur departamento a aporta tampoco, pero asina mes a haya sosten di likides. E punto di salida ta keda cu e recorte ta pisa pa e ambtenaarnan. Edward Maduro a bisa cu “no ta asina cu ta pretende cu ambtenaar tin salario miyonario.” Segun Maduro a sigui comenta, segun e trahadonan den Cocolishi si tin salario halto.
Ambtenaar a traha dia den y dia afo durante pandemia. Nan ta dispuesto pa aporta pero na no na e manera dictatorial manera el a tuma luga. SADA ta kere den dialogo pero no manera e ta bayendo. Desde aña pasa mester a cuminsa dialoga cu e sindicatonan, pero gobierno a dicidi pa impone. Minister di Finansa ta pretende cu no ta Aruba a propone e 12.6% mientras cu minister-presidente mes a indica esaki.
Pa SADA no tin agenda politico tras di esaki, nan ta kere den nan derecho di demostra nan opininion. Despues di e accion lo sinta cu nan miembronan pa asina analisa cual lo ta e siguiente paso. Lo reuni internamente cu tur sindicato pa por dicidi kico lo sigui den e siguiente pasonan. Maduro ta spera cu gobierno por recapacita y demostra cu di berdad nan tin e trahadonan na pecho. Ta tur ta pasando den e dolor di recorte aki.
Esaki ta e comienso y ta spera cu no mester escala, pero si e miembronan duna e mandato nan lo cumpli.Por ultimo Edward Maduro a conseha pa no tene miedo di haci uzo di e derecho pa expresa bo opinion a pesar di intimidacion.
