Diahuebs mainta Su Excelencia Gobernador di Aruba, Drs. Alfonso Boekhoudt a entrega e condecoracionnan Real na Aruba durante e tradicional “Lintjesregen”. Un total di 8 Arubiano a ricibi e distincion Real aki, kendenan ta diferencia di otronan pa nan participacion y trabou boluntario na comunidad di Aruba.

Durante e evento anual ta entrega condecoracion Real, basa riba e rol di cada un di e ciudadanonan. Tin algun diferencia y e condecoracionnan ta varia entre “Koninklijke onderscheidingen in de Orde van de Nederlandse Leeuw” y den “Orde van Oranje-Nassau”. Ambos ta tuma luga rond di e celebracion di hacimento di aña di SM Rey Willem-Alexander.

E aña aki un total di 2.908 ciudadano den henter Reino Hulandes ta haya condecoracion Real rond di celebracion di “Dia di Rey”. Den e asina yama “Orde van de Nederlandse Leeuw” a honra no menos cu 18 ciudadano y den e “Orde van Oranje-Nassau” a condecora no menos di 2.890 persona. Den e parti di Caribe Hulandes di Reino a condecora 23 persona. Na Aruba so a otorga 8 condecoracion Real, na Corsou a otorga 11 persona y na Boneiro a honra 4 ciudadano.

Na Aruba e condecoradonan ta:

• A promove Eduardo de Veer, biba na Aruba, for di “Ridder in de Orde van Oranje-Nassau” pa awor “Officier in de Orde van Oranje-Nassau”.

• Como “Lid in de Orde van Oranje-Nassau” a honra:

• X.E. Caciano, biba na Aruba

• D.A. Kelly, biba na Aruba

• A.M. Koolman-Chirino, biba na Aruba

• S. Lopez Henriquez-Orman, biba na Aruba

• A.M. Richardson-Peters, biba na Aruba

• I.J. Simon-Hernandez, biba na Aruba

• A.E. Toppenberg, biba na Aruba

Pa e merito di cada un di e condecoradonan, lesa: Discurso “Lintjesregen 2018” – Otorgamento condecoracion Real – Diahuebs 26 april 2018 – Gabinete di Gobernador di Aruba

Mester menciona cu Eduardo de Veer no tabata na Aruba pa ricibi su distincion Real diahuebs ultimo, pero lo haya esey otro siman despues cu e regresa.

Riba e foto adhunto por aprecia Eduardo de Veer, ex-CEO di MetaCorp, na Juli 2017, ora a nombr’e “Miembro Honorario” di Genootschap Nederland-Aruba, na ocasion di e celebracion di nan 20 añanan di existencia.

Pabien na TUR e condecoradonan pa nan aporte sin igual na nos comunidad, cada un na nan forma.

Comments

comments