Diaranson siman pasa, Gobernador di Aruba, Alfonso Boekhoudt a organisa un ceremonia special na “Cas Ceremonial di Gobernador” den Maria Christinastraat, pa celebra e homenahe special entrega na Eduardo de Veer. Den pasado a homenahe na De Veer caba como miembro den e “orde van Oranje Nassau”, pero for di Hulanda a bin proposicion pa promove awor como “Officier”, algo cu no sa sosode mucho comun.
E aña aki un total di 8 Arubiano a ricibi e distincion Real aki, kendenan ta diferencia di otronan pa nan participacion y trabou boluntario na comunidad di Aruba. E aña aki un total di 2.908 ciudadano den henter Reino Hulandes a haya condecoracion Real rond di celebracion di “Dia di Rey”. Den e asina yama “Orde van de Nederlandse Leeuw” a honra no menos cu 18 ciudadano y den e “Orde van Oranje-Nassau” a condecora no menos di 2.890 persona. Den e parti di Caribe Hulandes di Reino a condecora 23 persona. Na Aruba so a otorga 8 condecoracion Real, na Corsou a otorga 11 persona y na Boneiro a honra 4 ciudadano.
Eduardo de Veer no tabata na Aruba pa ricibi su distincion Real na april ultimo, pesey a haya di dje durante e evento separa siman pasa.
Pabien na TUR cu a ricibi un condecoracion Real pa nan aporte sin igual na nos comunidad, cada un na nan forma.
