Gabinete Wever Croes dentro di algun luna lo completa un aña na mando di nos pais, sinembargo ora cu scucha declaracion cu miembronan di su Gabinete ta duna na prensa, ta lanta e pregunta cu e Gabinete aki por bin na remarca pa un premio di “Rookie of the Year.”

Ora cu scucha declaracion duna pa Minister Presidente Evelyn Wever Croes riba e asunto di huma di WEB Aruba NV y salud di hende, un hende no por keda sin pensa riba e curashi cu nos Prome Minister tin.

Primeramente ta sigui cu e tradicion politico di su Gobierno di punta dede riba “otronan” y no riba nan mes ya cu ta Gobierno anterior di AVP, no a haci un estudio adecuado prome cu a muda waf di containter pa Barcadera.

Ta sumamente interesante pa mira den futuro ta kende Prome Minister lo bay pone responsabel p’e situacion aki, ya cu nan prome lugar, responsabilidad principal di compra di uzo di cualkier tipo di fuel oil p’e planta, ta sinta cerca e compania estatal cu ta cumpra esaki for di Refineria di Aruba y antes for di Valero.

Pa añanan largo a uza e mesun tipo di fuel oil y na masha poco ocasion a scucha critica of obhecion for di otro companianan estableci pa hopi tempo caba den e zona aki y companianan grandi.

Kende lo tin cu bay carga e consecuencia di uzo di e fuel oil aki manera cu Prome Minister ta pretende di convence pueblo cu su Gobierno ta fuerte den su posicion pa castiga esnan responsabel, sin splica kico e kiermen y sin bisa ta kendenan e kiermen.

Gobierno di AVP a bay laga un plan en cooperacion di GasUnie di Hulanda pa provee WEB cu gas p’asina e planta por draai riba gas so den futuro, pero despues di casi un aña, ainda no a scucha e Gobierno aki papia riba e posibilidad aki y sigui cu e trayecto cu a wordo inicia caba pa algun tempo.

E boef cu ta buscando den henter e asunto di uzo di fuel oil aki di WEB, lo por tin un historia cu ta data for di tempo di Gobiernonan di MEP den pasado y na lugar di perde tempo cu e tipo di declaracionnan bunita aki, busca solucionnan real y corecto y na mes momento bisa pueblo cu e promesa di Gobierno di MEP pa reduccion di awa y coriente, lo ta otro mas cu lo no wordo cumpli.

Otro Minister cu a regresa for di vacacion y a trata di sali dilanti cu donderboos den man, ta Minister di Labor, Glenbert Croes, kende a trata di splica e asunto di Excelsior Casino y den e proceso aki a haci algun declaracion sumamente yamativo.

E si no ta laga historia di Aura Casino ripiti su mes, pero kico e por haci, su e operador di Excelsior Casino bay bancarota? Net nada, pesey, nos ta considera su declaracion manera di uno di Tiger di Papel.

Dado momento Minister Glenbert Croes a papia di e corupcion cu tin y/of tabatin den DPL y den henter e proceso di duna ontheffing splicando algo cu ta mas bruha c’un liña di pisca.

Segun Minister Croes, tin algun hende corupto cu a wordo saca for di henter e aparato cu ta procesa permisonan di trabou y menciona cu tin un ex Minister (su primo) ainda bou di investigacion, pero dado momento e mandatario a sigura cu ainda tin trahadornan corupto den e sistema y cu su persona y su Gobierno ta trahando duro pa saca corupcion for di e sistema y pone nan responsabel pa nan actonan.

Pa sigura e proceso aki, Minister Glenbert Croes a mustra cu el a tuma e decision cu e mes personalmente lo supervisa y firma tur peticion pa trabou riba dje y a saca esaki hasta for di man di e Management Team cu e mes a nombra anteriormente.

E decision aki ta pone hende pensa cu Minister Glenbert Croes tin duda serio den credibilidad tambe di su management team y si e ta kere cu ainda tin negoshi ta tumando lugar cu actonan contra ley y coruptivo, lo tin miembronan di e management team aki envolvi. Si e miembronan di e management team aki ta respeta nan mes, nan mester a entrega nan retiro di inmediato y no acepta un insulto mas di e.o. Glenbert Croes.

Esey t’e impresion cu e ta creando sin cu el a bisa cu a manda e management team cas pa motibo cu nan a faya na saca esnan corupto for di e sistema.

Minister a lansa acusacionnan serio, di comerciantenan cu lo a paga pa ontheffing n’e Minister anterior y kendenan awor kier convence Gobierno actual pa haya 15 trahador for di exterior a cambio di empleo pa 5 trahador local.

Aki lo tabata bon pa Minister Glenbert Croes den su curashi di bin dilanti y papia riba e acuscionnan serio aki, menciona nomber di e comerciantenan aki y cu bou di ningun circunstancia si e hendenan aki a presta nan mes den pasado di ta parti di algo incorecto, nan no tin mag di bin na remarca pa ricibi ningun tipo di consideracion.

Sinembargo e tipo di declaracionnan aki ta desviacionnan cu pueblo lo haya pa scucha den e proximo lunanan, sigur di un Gobierno cu ta den cumpli un aña na poder sin por cumpli cu expectativanan cu nan mes a crea, cu nan mes a priminti na pueblo, pero sin por cumpli cu esakinan.

Skirbi Pa: Victor (Toko) Winklaar

Comments

comments