E ultimo dos simannan nos a scucha hopi debate, di politiconan y di huristanan, riba e mocion di desconfiansa cu a pasa contra ex-minister Marisol Lopez-Tromp. Cu si e mocion ta valido of no, cu si e presidente a actua robes of no. Pero mas pio ainda, si el a actua contra ley y a comete un delito penal, den e organo mas halto di nos pais. E pregunta cardinal cu nos redaccion ta haci awe ta: mr. Ady Thijsen por mantene su puesto?
E reunion publico di parlamento a tuma luga diahuebs dia 15 di october. Un reunion pa atende cu cambionan den ley y maneho di tiramento di pisca cu harpun. Dado momento den e reunion, e fraccion di MEP a presenta un mocion di desconfiansa contra minister Marisol Lopez-Tromp, como sorpresa, sin cu e fraccion di POR ni RED tabata na altura. Fraccion di POR a dicidi di sostene e mocion ora di voto, pero RED no. Y ta precisamente for di aki a cuminsa e problema. Na momento cu AVP a bandona edificio y RED a sali su tras, pa ley, e presidente di parlamento mester a para e reunion. Pero el a opta pa sigui, den loke su partner den coalicion a cataloga como un wega.
Pero con un mocion di desconfiansa por presenta di sorpresa asina durante un reunion den parlamento? Ta dicon MEP lo tin tanto presion pa baha Marisol Lopez como minister? Di unda e presion ey ta bin riba MEP? Ken tin un interes pa e baha for di e puesto y cu ki motivacion? Despues di e reunion, e fraccion di MEP a sali pafo pa anuncia nan logro. Pa prome biaha den historia di nos pais, parlamento a baha un minister den funcion via un mocion di desconfiansa. Desde e momento ey tur presion tabata riba Ady Thijsen, como presidente di parlamento. Ta con e por a permiti e reunion sigui y pio votacion pa baha un minister, cu solamente 10 miembro den sala di cual 9 so a vota legalmente?
Y un siman despues, diaranson dia 28 di october, e mesun presidente di parlamento a yama un conferencia di prensa cu caracter di urgencia pa anuncia cu e mocion cu tanto el a bringa pe, cu el a keha e minister na husticia, cu el a insinua cu huristanan no ta mir’e corecto y profesornan ta robes….e mesun mocion ey el a hala aden y anuncia cu a comete un eror constitucional.
E ultimo declaracion aki di berdad a sorprende tur hende y a laga nos corda cu e declaracion di minister Lopez-Tromp riba e mesun diahuebs anochi, ora tur cos a cuminsa.
Awo si nos compara e eror aki cu otro erornan den parlamento cu a costa cabes di e parlamentarionan, anto ta surgi e pregunta, esaki no ta mas serio cu tur e otronan? Sue-Ann Ras tabata e prome parlamentario pa tuma retiro, despues cu a gar;e ta mira pelicula via Netflix den Eerste Kamer na Hulanda. El a sinti cu el a falta respet na e organo mas halto den Reino Hulandes y a tuma retiro como parlamentario y bira consehero di minister. Luigi Bergen a tuma su funcion over y no a dura mucho cu problema na cas y maltrato domestico a pone presion riba dje cu e mester a retira tambe. Awo e presidente di e organo mas halto di nos pais ta comete un eror constitucional y di cual hasta ta cuestion’e di a conta un voto ilegal den Parlamento, awe ta retira e mocion y ta keda sinta manera nad’un pasa?
E contesta nos ta lag’e na nos usuarionan mes, pero un comentario so na final. E respet cu pueblo mester tin riba e organo mas halto di nos pais, esta nos parlamento, ta un respet cu cada un di nan mester merece y mester por bal’e.
