Awe, diaranson, autoridadnan concerni di Gobierno a dicidi di cera y blokia un edificio den Elleboogstraat.
A haya permiso di Abogado y representantenan di e doñonan di e edificio blauw.Esaki a bini debi na e diferente keho cu tin di comerciantenan rond di movecion di adictonan cu tabata biba den e localidad aki.
Tabatin cuatro adicto cu tabata biba den e edificio cual tabata bou control di “Chico Gang”.
Por corda ainda cu tabatin diferente incidente cu ta tuma luga den y pafo di e edificio unda cu tin reglamento di cuenta ey dilanti, un persona a yega di bula for di segundo piso y recientemente tabatin un caso di sobredosis unda e persona a fayece.
Despues di a ricibi e permiso, a cuminsa cu e trabou pa welder porta y bentana pa evita cu e hendenan adicto ta drenta den e edificio.
Arthur Comenencia di FACT Team tabata na e sitio principalmente pa atende cu e adictonan. El a splica cu nan ta buscando diferente alternativa y tin por ehempel Seroe Colorado unda cu por atende cu e adictonan. Ta busca luga pa e hendenan aki, pa prepara nan pa despues manda nan pa rehabilitacion mas avansa den exterior.
Arlo Franken di SAMBA, a splica cu hopi biaha ta duna nan un opcion, pero nan mes no kier. E problema di adiccion na Aruba ta hopi grandi. Ta berdad, el a bisa, ta cera e luga aki, pero nan ta busca otro luga pa hinca nan curpa y sconde, drumi. Hopi biaha mester keda papia cu e hendenan pa motiva nan pa bay na e luganan unda cu e FACT Team ta sugeri na nan. Un di e opcionnan ta SAMBA, unda cu e adictonan ta wordo atendi dunando nan alternativanan pero charlanan tambe pa encurasha nan pa busca e caminda pa laga adiccion un banda.
E edificio, unda tabatin un gym, ta bandona pa basta tempo caba te cu el a bay den un deterioro. E doñonan mes, segun por a compronde, tin algun aña caba bibando den exterior. Awo cu nan a duna permiso pa cera y isola entrada pa e edificio, organisacionnan concerni sigur lo sigui controla e situacion pa evita cu e adictonan ta invadi e luga atrobe.
