Ayera tabata un dia grandi pa Aruba unda cu a ser demostra cu nos sistema parlamentario a conoce un cambio drastico.
Den nos constitucion nos parlamento ta e organo di mas halto na Aruba unda cu e organo aki tin no solamente e poder legislativo pero e elementonan pa controla gobierno y den esaki tin e derecho di haci pregunta. Tambe e derecho di yama e minister bin dilanti, responsabilisa su mes pa su maneho y tambe pa uso di placa di pueblo. Lamentablemente cu no ta tur fraccion conoce nan reglamento di ordo, no conoce nan funcion y ta un berguensa con ayera miembronan ta bin dilanti. Y esakinan a duna muestra pakico tur rapport tabata papia di un deficit parlamentario debi cu parlamento tabata netamente un vocero di gobierno enbes di ta esun cu ta controla gobierno. Ta pesey awe nos ta hinca cu tur e problemanan financiero pasobra enbes di haci nan trabao den boca di pueblo nan “tabata traha koffie pa e minister y despues sinta aplaudi” enbes di cuestiona y sirbi pueblo.
Kico a pasa ayera?
Un fraccion di MEP madura y sigur cu conocemento di reglamento di ordo di Staten y di nos constitucion a haci su trabao manera esaki ta indica. Nos a tuma nota cu Minister Otmar Oduber a dicidi cu su maneho ta di cobra entrante 1 di juli 2018 pa recoge sushi y cu un sistema di cobransa. Nos como parlamentarionan corectamente a manda por escrito preguntanan na e Minister debi cu nos a aloca 5.4 miyon florin extra cu a ser pidi den e presupuesto 2018 pa Serlimar por funciona optimal. Tambe pregunta pakico ta cobra pueblo pa 2018 y con a yega na e formula di cobransa. Ora a haya e contestacion nos no a ser contesta debidamente y nos a pidi un reunion publico riba e e topico di cobransa y e extra 5.4 miyon florin.
Mainta tempran a drenta un carta di Conseho di minister, e mesun conseho cu un parlamentario di mesun coalicion a duna un brevet van onvermogen, caminda a trek in e cobramento y a hala esaki pa 1 di januari 2018. Tambe den e carta ta indica cu lo usa e fondonan di begroting pa esaki y lo bay revisa e formula di cobransa. Na e momento ey no tabatin ningun motibo mas di tene un reunion publico debi cu nos Fraccion – cu of sin sosten di partidonan di coalicion – tabata di entrega un mocion pa por cambia e fecha, no cobra pa 2018 y tambe pa revisa e formula di cobransa.
Bon funcionamento di parlamento
Lamentablemente por a scucha na radio y den prensa cu MEP a para reunion y ta di lamenta cu parlamentarionan no ta lesa nan reglamento di ordo y tampoco ta bisa e berdad cu e motibo pa tene e reunion no tabata existi mas. A logra cu pueblo lo no paga pa 2018, cu lo revisa e tarifanan y tambe cu e 5.4 miyon florin extra lo bay pa e meta cu el a ser pidi pe. Nos di fraccion ta para firme pa un bon funcionamento di parlamento y unda nos lo controla ki ta ser haci cu placa di pueblo y mi ta spera cu ministernan y tambe otro parlamentarionan cuminsa compronde nan trabao y haci esaki manera debe ser. Y sigur na augustus ora yama tur minister un pa un pa duna cuenta ki nan a haci cu nan maneho y ki nan a haci cu placa di pueblo mi no mester tene e dramanan infantil aki pasobra debi cu mi ta haci mi trabao manera debe ser.
