Parlamentario di fraccion di MEP Edgard Vrolijk a informa cu a pidi Presidente di Parlamento pa yama un “Bijeenkomst” publico cu minister di enseñansa Rudy Lampe y e veld di enseñansa. A pidi pa e reunion aki tuma luga mas lihe posibel.
Mientras cu ta spera riba un fecha pa e reunion aki, e parlamentario por a adelanta cu su persona sigur no ta di acuerdo con e minister encarga, Rudy Lampe, a maneha e situacion. A bay publico cu algo, sacando conclusion, sin cu a papia cu esnan envolvi.
E expresionnan cu e mandatario a habri siman cu ne, no a cay den bon tera cerca docentenan di Colegio San Nicolas. “Nos como fraccion di MEP a entrega un peticion na Presidente di Parlamento pa yama un encuentro publico urgente riba e topico aki. Nos kier clarificacion,”e Parlamentario a bisa.
Loke el a haya cu no tabata na su luga ta cu e mandatario a menciona e asunto publicamente, e ta mete den privacidad di un persona. Mencionando e asunto di e forma aki, ta kibra derecho di privacidad di e docentenan. Pa algo asina mester por manda yama e mandatario.
El a cuestiona pasobra e supuesto rapport ta papia di “bevindingen”. Tipo di rapport asina, el a menciona e caminda cu normalmente e ta cana. Sigur den e proceso mester scucha esnan marca. “Tur hende tin derecho di scucha y wordo scucha.” Den casonan asina mester busca pa sa pakico a constata cierto problema. “P’esey mi a haya hopi straña cu minister a sali haci cierto expresion riba hendenan. Esey no tabata na su luga. E mester a revisa e proceduranan y mira kico a pasa, cu ta e motibo cu a yama e encuentro publico.”
A pidi un encuentro publico, pasobra di e forma aki por yama e partidonan y haci pregunta na e personanan aki tambe. Por resulta cu despues di e “moment opname” a soluciona e problema cu tabatin caba. E ta haya cu no tabatin base pa e mandatario expresa su mes di e forma en cuestion contra e maestronan. Lesando e rapport tambe el a constata cu hopi di e puntonan ta regarda e Management Team (MT) cu a faya. Henter e expresion di e mandatario a causa un conmocion cu no tabata necesario na e momentonan aki. Y si tabatin erornan Management Team mester a tuma pasonan. “E proceso di bini dialuna grita, acusa tur hende, no ta sirbi e pais pa nada.”
