Edgard Vrolijk: Ningun lider di un partido den coalicion por exigi retiro di ningun hende den MEP

E novela of e show di Netflix no a caba. Despues cu lider di partido RED den un programa na radio a critica su colega di coalicion Sue Ann Ras fuerte y a exigi pa tuma su retiro, finalmente miembronan di fraccion di MEP a reacciona. Esaki a sosode durante e conferencia di prensa di MEP diaranson mainta

Ta parce cu e mashin di “control damage” a cuminsa traha den full speed” practicamente dos siman despues cu e scandal Netflix a tuma luga. Un grabacion di Parlamentario Sue Ann Ras mirando un pelicula riba Netflix den pleno reunion di Eerste Kamer, a causa ola di critica te cu el a entrega su retiro y despues a bula bay vakantie pa Colombia.

Awe su coleganan Edgard Vrolijk y Setty Yarzagaray porfin a bini y pone Ricardo Croes na su luga, bisando pa e no kere cu e por bin dicidi den partido MEP si Ras mester retira of no. Vrolijk, sin menciona nomber, a referi cu “tin hendenan a kibra ley di droga y abiertamente ta bisa esey. Y awendia y mañan ta papia di otro hende. Mi kiermen, nos mester por wak den nos cura prome cu wak den esun di otro,” Vrolijk a expresa.

Edgard Vrolijk: Ningun lider di un partido den coalicion por exigi retiro di ningun hende den MEP.”

Edgard Vrolijk: Ningun lider di un partido den coalicion por exigi retiro di ningun hende den MEP.”

Posted by 24ora on Wednesday, July 10, 2019

E Parlamentario di MEP na mesun momento a papia cu aki na Aruba e hendenan grandi tambe ta “bully” otro hende y esey ta loke cu a pasa cu su colega Sue Ann Ras, kende e ta compronde cu el a actua den forma emocional despues di tur e reaccionnan.

El a reacciona riba e expresion haci door di Ricardo Croes, kende a bisa cu Sue Ann Ras mester tuma su retiro. “Anos di MEP ta dicidi ken ta keda y ken ta bay. Niun hende pafo ey por dicidi pa nos. Niun otro partido ni cu ta den coalicion, ni con e ta grita ni cu e ta lider di un partido den coalicion no por exigi retiro di ningun hende.”

Na final e Parlamentario di MEP ta bisa cu tur hende den mundo por haci fout pero mester huzga nan pa nan trabou y no pa e eror cu el a haci. “Si abo ta miho, coy e prome piedra y tir’e. … Esaki ta pa esnan cu ta haci riool politiek y lastra hende.”

Setty Yarzagaray ta bisa cu e tabata sinta banda di Sue Ann Ras, a bisa cu su colega a admiti cu e tabata fout. Pero loke si el a haya malo cu nan mesun partner den coalicion a yega huzga, prome cu el a dicidi di puntra kico a pasa. Esaki ta algo cu e ta condena totalmente.

Comments

comments