Dialuna 13 di September, durante e reunion publico den Parlamento, Prome Minister mr. Evelyn Wever-Croes a felicita y gradici mr. Edgard Vrolijk pa su nombracion como Presidente di Parlamento di Aruba pa e periodo 2021-2022.
Posicion di Presidente di Parlamento ta esun mas halto den nos constitucion cu tin su retonan cu ne. Gobierno di Aruba y Fraccion di MEP tin tur confiansa cu. Vrolijk, pa medio di su conocemento y experiencia, lo haci un bon trabou. E ta un persona husto y firme y esey nos mester pa mantene e orden den sala di Parlamento. Ya caba den e ultimo dos lunanan a mustra cu a gana confiansa den comunidad y cu e votonan di dialuna mainta ta un confirmacion di esaki cu mr. Edgard Vrolijk lo sigui haci un bon trabou.
Prome minister a expresa tambe cu den comunidad ta sinti alegria di esunnan cu ta sigui e reunionnan. Den dos luna, Vrolijk a mustra cu e lo ta ta un presidente pa henter Parlamento. Den pasado, tempo cu partido MEP tawata den oposicion, a conoce Presidentenan di Parlamento cu tawata solamente pa un parti di Parlamento y tabata lubida riba oposicion y tabata stroba oposicion di eherce su trabou. Vrolijk a demostra di ta husto y ta permiti tur dos banda haci nan trabou manera mester ta y esakinan ta puntonan cu ta hopi importante den e temponan aki.
Prome minister a dirigi su mes na mr. Edgard Vrolijk bisando: “Mi ta desea bo hopi exito y hopi forsa. Tambe na e Vice Presidente actual, Ursell Arends, exito pa e temporada aki. Cu nos bon Dios por bendiciona no solamente nos pais pero cu nos por logra cu den e dirigencia cu boso ta mustra den e parlamento aki por sigui gana e confiansa di comunidad manera boso a bin ta haciendo”.
