E siman aki ta un siman hopi importante unda nos lo trata e presupuesto di pais Aruba pa loke ta aña 2018. Un presupuesto cu mester a ser entrega 1 september 2017 y cu mester a ser trata y aproba ultimo 15 december 2017.
Sinembargo debi na falta di madures y seriedad politico a keda sin entrega e presupuesto y a opta pa bay eleccion sin cu esaki a ser entrega door di Gabinete Mike Eman II y unda cu for di esaki a haci cu nos tabatin un deficit financiero di no menos cu 276 miyon florin. Nos gobierno a sa di reduci gastonan aki aya y awo nos por tin un deficit di 150 miyon florin cu seguramente a duna nos confiansa cerca gobierno Hulandes y CAFT.
MEP asumiendo responsabilidad
Nos como parlamentarionan ta tuma nos trabao hopi na serio unda cu nos si ta asumi nos responsabilidad na un manera madura pa por trata e begroting cu lo marca e rumbo di e pais aki y su futuro pero tambe di e gobernacion. Lamentablemente cu tin parlamentarionan di oposicion manera sr. Arthur Dowers, sr. Richard Arends y tambe sra. Mervin Wyatt-Ras cu ta keda purba gaña y manipula pueblo unda cu nan ta lesa cierto frasenan di e presupuesto y ta haci manera cu ta 9 aña pasa unda nan por a manipula pueblo pa medionan di prensa comprometi.
Politica dinosaurus di Dowers
Sr. Dowers ta haci mofa di Minister di Finansas, Economia y Cultura di cu e ta baila aki aya. Awor a para bira cu nos niun no por haci nada mas cu nos ta gusta haci y ta custumbra di haci pa tene sr. Dowers y AVP contento. E cosnan infantil aki tin di stop y sr. Dowers mester cuminsa actua manera un hende homber madura y stop cu su politica di DINOSAURUS. Mesun parlamentario hunto cu su colega Richard Arends ta usa frasenan di Raad van Advies, unda esaki ta indica cu tin un diferencia di mas cu 100 empleado publico na 2018 compara cu 2017. Pero nan a lubida di bisa cu na pagina 19 di Nader rapport ta para exactamente di con tin 100 hende extra. Motibo ta cu a bin personal acerca debi cu mas departamento a cay bou di otro, a cuminsa dos opleiding di aspirant polis, personal pa Orthopedagogisch centrum y Bureau Mulidisciplinaire centrum. Banda di esaki a bin 65 hende pa enseñansa y tambe 47 empleado di e ex Landslaboratorium cu a bin den gobierno. Y no tin di lubida tur esnan cu a haya un decreto gubernamental (LB) net prome cu eleccion cu ta haci cu esaki ta hopi mas cu 100 hende cu a bin acerca.
Barbaridadnan di Mervin
Sra. Mervin Wyatt-Ras tampoco no kier keda atras y ta cuminsa papia su barbaridadnan manera custumber unda cu ta bisa cu nan ta trapa riba su derecho di tempo cu ta ser limita. E tin hopi curashi pasobra tempo cu a duna oposicion 2 dia so pa studia begroting y laga un minister so papia 7 ora, e no a keha y awo ta sinta yora cu 1 siman pa prepara ta tiki tempo. Ora a permiti pa insulta coleganan y yama nan hasta pa porco y scupi riba nan no a protesta pero a sinta hari y burla.
Modelo fracasa di Richard
Sr. Richard Arends diripiente no ta amigo mas di CAft. E mesun persona cu ta gaba con CAft ta elogi’e pa por a logra yega e normanan y awendia ta vocifera cu modelo economico usa pa sr. Richard Arends no a funciona, su fuse a bula. Tur instancia a bisa bon cla cu e modelo economico usa pa sr. Arends a crea mas deficit y tur rapport ta papia di 276 miyon di deficit. Y sin lubida Centrale Bank den su rapport cu ta indica cu di 2015 nos economia ta den reces. Pues su modelo economico ta uno fracasa, pero siguramente su modelo a sirbi economicamente p’e unda cu su persona a sa di cambia su arbeidscontract den un dienstverleningscontract cu su compania Horizon Consultancy Group pa nada menos cu 442 mil florin den un tiki mas cu 2 aña y cual suma a ser strica di pueblo, sin compasion. E modelo economico a traha p’e y sigur tur esnan rond di gobierno pero awo e cobransa di tur abuso cu placa ta bin pa pueblo.
