Edmond “Eddy”Paris ta miembro di MEP y ta na Hulanda fungiendo desde april como minister plenipotenciario. Segun su persona no ta busca pa ningun husticia. E ta di pensamento cu si e kier a sconde pa husticia, e no lo ta biba na Den Haag, unda e ta traha como representante di Aruba.
“Mi a tuma nota di un articulo cu a keda publica dia 19 di juli 2021 ariba e portal di un media local, 24 ora, cu e titular: ‘Edmond Paris di MEP ta scondiendo na Europa pa husticia di Aruba’. Permiti mi clarifica un ke otro. E ta di lamenta cu akinan ta trata di un intento di difamacion.
Desde principio di aña 2018 ami ta representando Aruba den Reino Hulandes, den e funcion di ‘Representante di Aruba na Union Europeo’ y mi ta bibando na Den Haag, Hulanda. Den e rol aki cu ami a ser apunta p’e, e no lo ta posibel pa ami “sconde” pa husticia di Aruba na Hulanda.
Tambe, e media local ta indica den su articulo cu e lider di MEP lo por a informa mi pa keda Hulanda pa no mester atende cu husticia na Aruba”, segun Edmond Paris.
Manera cu e media local aki mes a indica den e articulo siguiente cu a sali ayera, 20 di juli 2021, lider di MEP, mr. Evelyn Wever-Croes, a instrui hustamente su persona pa keda Hulanda den e periodo di campaña, pasobra cu pais Aruba mester di un representante permanente den Rijksministerraad (“RMR”) na Den Haag.
En particular, pa ariba dia 18 di juni 2021 pa e aprobacion di e di 6 tranche di liquiditeitssteun (prestamo) pa e suma di Afl. 181 miyon pa Pais Aruba. Como tambe pa dia 9 di juli 2021 pa e reunion di e topico di geschillenregeling. E ta importante pa Aruba demostra respet pa cu reunionnan di RMR y pa tin un representante eynan. Kisas awe mas cu nunca Aruba mester demostra madurez politico y pone posibel interesnan personal un banda pa promove un bon relacion cu Hulanda. Gran parti di e recuperacion economico di pais Aruba ta depende di esaki.
“Ami sigur a pone mi interesnan personal un banda, door di por ehempel no forma parti directo (na Aruba) di e campaña electoral na Aruba, pa ami por a keda representa Aruba na Hulanda y na Bruselas. Mi decision pa ta ausente durante e campaña 2021 pa Parlamento di Aruba, cu consecuencia cu mi lo riesga y bay considerablemente atras den voto, tabata un decision personal cu a nace for di e sentido di responsabilidad pa mi pais Aruba. Ademas, desde april 2021 mi ta ocupa e funcion di Minister Plenipotenciario na Hulanda y desde december 2020 mi ta e Presidente di e Comite Ehecutivo di OCTA. E dos posicion nan aki mi no por wordo laga desatendi pa bay Aruba den temporada di e campaña 2021”, el a sigui bisa.
Paris a indica cu: “E eleccionnan pa Parlamento di Aruba no por tabata un motibo pa su persona pidi 23 pais miembro di OCTA, Comision Europeo y otro stakeholder na Europa pa para cu tur trabou pasobra cu ami lo mester a bay Aruba algun luna pa core campaña politico. Ta di lamenta cu ta purba di desacredita mi persona uzando un supuesto ‘buskeda’ pa parti di husticia di Aruba. Den ningun momento ami lo por a haci algo contra ley of “a beneficia mi negoshi”.
Ta trata aki nada mas di un caso huridico cu el a entama contra di un banco local y esaki a tuma luga hopi aña prome cu ami a drenta politica. E decision di Corte ta publico. Lamentablemente e media local aki ta purba di saca esaki for di contexto y sin tin prueba pa haci esaki. E decision di Corte tabata cu el a perde su caso, pasobra den ley no ta para cu hues por obliga banco cerca ken e por bay pa busca e placa fia.
E ta lamenta tambe cu den e articulo di e media local aki, ta menciona su yiunan, kendenan cu hopi alegria a bay Hulanda pa bishita su persona, pa por pasa tempo familiar hunto, como cu ta imposibel p’e bishita nan na Aruba pa un luna largo door di su responsabilidadnan na Hulanda / Bruselas. “Manera cu mi ta promoviendo pa hopi aña caba y a ser treci den varios ocasion durante e campaña 2021 cu a pasa, ta momento pa nos hiba un politica nobo, sin atake personal y menos ora cu no tin prueba pa esaki. Mi ta haci un apelacion na media local en general pa ta imparcial, informativo y pa contribui na comparti noticia politico di nivel”.
