Cu asombro PPA a tuma nota di e suceso di e actonan publico. Hopi inmoral cu a tuma luga diaranson siman pasa y e consecuencianan pa tanto nos economia como p’e imagen internacional di nos pais, relaciona cu e yegada di e barco crusero Atlantis cu 5 mil hende homber homosexual y nan comportacion bochornoso riba nos dushi isla Aruba.
Tur e imagennan di video cu a plama rond mundo via media social y e homosexualnan local, tabata soño di un comportacion hamas bisto publicamente na Aruba y cu a bin resulta den un realidad.
Asombro pa PPA tabata mas grandi ainda ora cu a resulta cu nan no a bin pa celebra Carnaval pero pa nan mesun celebracion publico di acto y comportacion inmoral y falta di etica cu a laga pueblo di Aruba den un asombro hamas bisto.
Unda Gobierno a keda, unda e parlamentarionan a keda y unda ATA a keda pa reacciona, sea pa cuestiona y distancia nan mes di e sucesonan bochornoso, inmoral of cu nan tabata di acuerdo y ta sostene loke a tuma luga?
Nos ta inverti hopi placa den Fondo di Turismo pa promove Aruba rond mundo pa ricibi e turistanan y pasobra esey ta nos pilar economico mas grandi.
Nos ta depende di turismo y nos nivel di servicio y nos hospitalidad ta di renombre mucho halto, pa di e forma aki lag’e cay na suela door di un solo crucero cu 5 mil hende homber homosexual.
PPA ta puntra su mes ki preparacionnan y promocion a haci pa ATA na Merca pasobra ta conoci cu e liña crucero Atlantis a lanta specialmente pa organisa evento pa hende homber homosexual.
Riba 31 di januari di e aña aki ya caba tabata conoci cu riba e Site di Atlantis e barco The Harmony of the Seas, cu nan ta organisando e Crucero Gay mas grandi den historia, cu e rutanan bao di cual Aruba tambe tabata completamente sold out.
Tabata prohibi p’e pasaheronan divulga / haci publico (via Post online) loke cu tuma luga riba e Barco, pero a resulta cu un participante ferviente conoci como partygoer di e conocido Alantis a remarca publicamente ‘This year is going to be the wildest party for our community in 2 years’.
‘I’m talking dirty dancing, sex, drugs, raves, orgies’.
Nada di loke tabata tuma luga riba e Barco no por a sali pa publico sin authorisacion di Atlantis. Pero na Aruba nos por a haya aparentemente djis un bista chikito di loke cu abordo tabata tuma luga.
Aruba a experiencia esaki sin un solo tipo di limite di berguensa den dia cla, abierto pa mayor, mucha, comerciante y otro turista den vecindario di entre otro Bestuurskantoor.
PPA ta hala atencion di gobierno, minister di turismo y salubridad publico y ATA con e suceso aki por a tuma luga.
Ta ki maneho Aruba ta aplica pa promocion di Aruba mundialmente?
Gobierno tabata na altura di loke cu tabata na caminda y ki preparacion tabatin y cu cua instancia local responsabel?
Ta ki Imago Aruba kier despues di e suceso perverso aki y mas aleu PPA kier den e caso aki tene Atlantis responsabel p’e comportacionnan demostra.
Tambe duna boet na Atlantis y paga daño y perhuicio p’e imagen cu nan a daña di Aruba.
PPA ta puntra tambe ta dicon Polis despues di a haya e prome kehonan no a actua y si a parti boet y ki capacidad KPA a pone disponibel pa actua den caso di comportacion inmoral publico.
Ki palabarcion e minister di turismo y ATA a haci cu Atlantis y otro posibel compania crucero cu ta of lo bay frecuenta Aruba pa loke ta trata e grupo LBGHTQI?
Kico ta aceptabel pa loke ta trata e entradanan di Pais y si Aruba cu su moral cristian y norma y balor kier sacrifica esaki pa placa?!
Nos tin cu bay nenga e cruceronan cu no ta tene nan mes na nos normanan y balor manera cu a pasa na aña 1998 na Bahamas y Cayman Island.
PPA ta sostene turismo pero enfaticamente ta señala cu tur turista cu bishita nos isla ta bonbini pero den cuadro di e limitenan di comportacion cu ta comun y coriente pa nos.
PPA ta para pa democracia social y ta contra discriminacion a base di rasa y of orientacion sexual.
PPA kier tambe pa ricibi comportacion aceptabel di turistanan conforme nos imagen di One Happy Island.
Durante ultimo eleccion PPA tabatin den su programa cu cada ciudadano na Aruba por ta sinti su mes sigur y cu e tin su derechonan salvaguardia.
Den cuadro di e desaroyonan actual y discuscion di Matrimonio di Homosexual, PPA ta para pa matrimonio entre hende homber y hende muher, manera stipula den Burgerlijk wetboek van Aruba y ta subraya articulo 12 di Tratado Europeo di Derecho Humano den cual ta stipula cu e matrimonio ta netamente entre homber y hende muhe.
