Conoci den e sector comercial, speciamente den e mundo bancario den e ultimo añanan, Eddie Paris a anuncia awe cu e ta cla pa e reto, como representante di Aruba den Union Europeo na Bruselas, na Belgica. E lo remplasa Cedric Tilma cu a ocupa e funcion ey e ultimo añanan bou Gabinete Mike Eman.
“Despues di e segunda guerra mundial e famoso pionero y fundador di KLM, Albert Plesman, a haci su mes e pregunta; Riba kico Hulanda mester concentra pa crece economicamente? Su vision pa stimula un educacion cu lo zorg pa hobennan concentra riba e promocion di un economia di export a resulta den e conocido Nyenrode University. Y den añanan ‘70 European University a introduci e programa di MBA entre otro na Antwerpen. Eynan ami tambe a siña, 22 aña pasa, un poco di e business methodologies Europeo”, asina Eddie Paris a skirbi awe riba su pagina di Facebook.
El a sigui bisa cu “Awe mi ta honra cu mi lider y partido a deposita nan confiansa den mi pa representa Aruba na Union Europeo na Bruselas. Cu mas di 20 aña den e mundo corporativo mi ta sinti’mi bon prepara pa e reto nobo aki”.
Pa contesta e pregunta “wat voor eigenschappen zouden de jonge studenten moeten beschikken?”, Plesman a enfatisa; “de lust zich in den vreemde een bestaan te veroveren”.
Eddie Paris a sigura awe cu “Compartiendo e vision di mi colega pro-activo, Guilfred Besaril, Ministro Plenipotenciario, mi ta confia cu nos lo crea un bon esprit de corps aya na Hulanda. Asina tambe, dirigi pa nos lider dama-dinamica Evelyn Wever-Croes, nos lo conkista un presencia respetabel na Europa pa promove entre otro interesnan financiero economico pa un miho futuro pa Aruba”.
El a finalisa bisando: “Di akinan mi miho deseonan pa un prospero 2018 pa un y tur na Aruba”.
