Eddie Paris: Si no ta pa MEP, Aruba lo a bay failliet!

“Caba di sali for di un reunion (na Tweede Kamer) di e vaste commissie voor Koninkrijksrelaties. Awe a toca entre otro e tema di Rijkswet financieel toezicht pa Aruba. Como Arubiano ta doloroso pa scucha Secretario di Estado Raymond Knops admiti na e comision cu si no a bin cambio den gobernacion (na 2017) anto Aruba lo a bati failliet!”, asina Vice Minister Plenipotenciario di Aruba na Hulanda, Eddie Paris, a publica riba red social.

El a sigui skirbi mas leu cu Knops a reitera cu ta “danki na palabracionnan dificil cu nos Minister Presidente y Minister di Finanzas, caminda cu Hulanda a obliga Aruba pa tuma medidanan”, cu awe Aruba ta atrobe ariba un caminda responsabel pa por cumpli cu nos creditornan financiero. Awe tabata hopi evidente con tur partido politico akinan, incluso CDA, tin admiracion pa e disciplina financiero di Gabinete Wever-Croes I.

Asina tambe nos lo por yega na alivia nos pueblo na su debido tempo di e medidanan -scondi- cu nos a hereda for di e gobierno anterior cu a causa e ultimo añanan un perdida enorme den e poder di compra di nos hendenan.

Edmond “Eddie” Paris a aparece riba lista di MEP na number 22 den eleccion di september 2017 y a logra 140 voto. E ta representante di Aruba pa Union Europeo y alabes Vice GevMIN na Hulanda. Algun luna pasa, despues di a asumi funcion, el a perde un caso civil contra su dunado di trabou anterior, Banco di Caribe, cu a cobr’e como 600 mil florin pa un fiansa cu el a haci y no a paga bek.

Awe atrobe nos por scucha aki na Hulanda cu “Aruba ta parti di Reino”, y cu “Hulanda kier coopera cu Aruba a largo plazo”, “duurzaam bouwen in Caribisch Nederland”, etc.

Esaki ta habri portanan tambe pa pronto nos yega na contribucionnan financiero di parti di Union Europeo pa cu e reto di imigracion ilegal for di Venezuela.

Poco-poco pero sigur y na un manera transparente y responsabel nos lo yega tambe na entre otro inversionistanan pa sigui stimula nos economia na un manera responsabel cu sectornan nobo y genera tambe asina mas ingreso.