Ecogas awor aki ta reciclando y exportando 15% di tur sushi residencial y comercial di Aruba, dentro di algun luna EcoGas lo recicla y exporta e resto di 85% di desperdicio, exportando envirobalesnan pa Colombia pa ey uza nan como combustibel den fornonan cu ta produci cement. E calidad di e envirobalesnan cu EcoGas ta produci despues di un proceso profesional y moderno di reciclahe, ta haci cu por uza e material sin ningun problema. Pa esaki EcoGas a firma un acuerdo cu Grupo Argos S.A. e siman aki na Cartagena, Colombia.

“Nos vision pa cu reciclahe y procesamento di desperdicio a inicia desde aña 1985 caba cu Ecotech. Na caminda nos a profesionalisa e sistema cu EcoGas den un esfuerso pa procesa sushi produciendo gas pa genera coriente. Di eynan nos a cambia pa Envirobales cu awor aki nos ta derando na Ser’i Tijshi. Pero, awor nos a logra yega na un solucion mas practico, mas eficiente, mas duradero y mas cu tur cos, sin inversion adicional y sin ningun costo adicional na comunidad”, asina Eddie de Veer, CEO di MetaCorp a duna di conoce despues di a firma e acuerdo historico aki cu Grupo Argos na Cartagena.

E acuerdo aki, cu ta awor ainda ta den forma di un MoU, pendiente ultimo revisionnan di abogadonan di ambos compania na Aruba y na Colombia, a tuma lugar na nan fabrica di cement na Cartagena. Pa Aruba tabata presente Eddie de Veer y Robert Carrasquero di MetaCorp, Ramsey Halabi, Alfredo Ruiz y Wendell Bennett di EcoGas. Pa banda di Grupo Argos S.A. tabata presente Carmen Aidee Aspiazu, den represetacion di gerencia di e compania y Mauricio Giraldo, como Director di Recursonan Alternativo.

Cu e acuerdo aki, EcoGas Aruba, funda desde aña 2010, ta cla pa hiba maneho di desperdicio na un siguiente nivel. Cu e acuerdo, e recogemento di sushi ta sigui mesun cos, e procesamento di sushi tambe ta sigui normal den e planta di EcoGas, pero enbes di hiba e Envirobalesnan pa Ser’i Tijshi pa dera nan bou tera, lo hinca nan den container y exporta nan pa Colombia. Ey ta uza e bultonan den forno pa logra yega na temperaturanan halto pa traha cement.

“Di e forma aki, ningun sushi ta keda atras mas. Pasobra carton, aluminium y hero nos ta recicla caba y exporta. E poco likido cu nos ta saca for di e sushinan ta bay planta di purificacion pa recicla y e resto, cu awor nos ta dera, nos lo exporta pa Colombia, uzand’e pa traha cement. Pues nada ta keda atras, ni na Aruba y ni na Colombia. Di e forma aki nos ta soluciona un reto di hopi decada riba nos isla”, asina Ramsey Halabi a bisa cu un cara di satisfaccion, despues di biba e momento historico aki.

Pa EcoGas, locual ta mas importante den e acuerdo aki ta cu e formula lo no costa mas placa pa pueblo ni pa comercio. Lo sigui paga mesun cos cu ta pagando awo, pero cu un satisfaccion cu e sushi no ta bay riba dump pa crece bay halto. E solucion aki ta esun mas eficiente, economico y bon pa medio ambiente cu tin riba mesa awor, pasobra otro idea lo conduci cu automaticamente e suma cu ta paga awor pa recoge y procesa sushi lo aumenta drasticamente manera e Ministro a anuncia e siman aki!

Tocante Grupo Argos 

Grupo Argos S.A. ta un compania Colombiano funda na aña 1934, cu inversionnan grandi den e industria di cement y energia. Su operacion di cement ta opera for di 15 diferente pais, manera Colombia, Merca, Panama y for di Caribe. Su oficina principal ta establece na Medellin, Colombia y na Merca nan ta opera for di nan oficina situa na Alpharetta, Georgia.

Cementos Argos S.A. ta un productor di materialnan di construccion na Colombia, lider den e mercado di cement na Colombia. E ta e di 4 productor mas grandi di henter Latino America y e unico productor di cement blanco na Colombia. E ta e di 2 productor mas grandi di concret y e di 4 productor di cement mas grandi di Merca y ta exporta cement y clinker pa 27 pais rond mundo. Nan tin 14 planta di cement, di cual 11 ta situa na Colombia y e resto na Panama, Haiti y Republica Dominicana.

Comments

comments